حسێن قائیدی: هه‌تا نوكە سێ هزار و 579 کەسێن ئێزدی هاتینه‌ رزگار کرن

ئاژانسا خانی:

بەرپرسێ نڤێسینكه‌ها ڕزگاركرنا ره‌ڤاندییێن ئێزدی ژ دەستێ دا*عشێ دیار كر: ل ده‌مێ هاتنا داعشێ شەش هزار و 417 کەسێن ئێزدی کەفتبوونە دەستێ تیرۆرستێن دا*عشێ، ژ وی ده‌می هه‌تا نوكه‌ سێ هزار و 579 کەس هاتینه‌ ڕزگار کرن، دیسان هه‌تا ڤی ده‌می دو هزار و 596 کەس ژی د به‌رزه‌نه‌.

حسێن قائیدی، زێده‌تر بۆ ئاژانسا خانی گۆت: ل 3 ی ته‌باخا 2024 ێ” داعشێ هێرش كره‌ سه‌ر ده‌ڤه‌را شنگالێ” ئه‌ڤه‌ 10 سال بورین ب سەر کوشتن و ڕه‌ڤاندنا کوردێن ئێزدی، ل هەرێما کوردستانێ ب وێ هه‌لكه‌فتێ چەندین چالاکی ل سەر ئاستێن بلند هاتنه‌ كرن” هه‌روه‌سا نڤێسینگەها ڕزگارکرنا ڕه‌ڤاندییان ل سالا 2014 ێ ” ب بڕیارا نێچێرڤان بارزانی هاته‌ دامەزراندن، ئارمانجا سەرەکی ژی ڕزگارکرنا ره‌ڤاندییێن دەستێ دا*عشە؛ لدووڤ وان ئامارێن گه‌هشتینه‌ دەستێ مه‌، شەش هزار و 417 کەسێن ئێزدی کەفتبوونە دەستێ تیرۆرستێن داعشێ و هه‌تا نوكه‌ سێ هزار و 579 کەس هاتینه‌ ڕزگار کرن، د هه‌مان ده‌مدا هه‌تا نوكه‌ دو هزار و 596 کەس د به‌رزه‌نه‌” کارێ مه‌ ژی یێ بەردەوامە و دێ بەردەوام ژی بیت هندی ئێك كه‌س ژی ژ ره‌ڤاندییان د ده‌ستێ داعشێ دابیت و دێ هه‌موویان رزگار كه‌ین.