شوكری جه‌میل: ئه‌ڤه‌ شه‌ش رۆژه‌ رێگری ل ھنارتنا بەرھەمێن دهۆكێ بۆ عێراقێ هاتییه‌ گرتن

شوكری جه‌میل” سه‌رۆكێ ژوورا بازرگانی و پیشه‌سازی ل دهۆكێ دیار كر:ئه‌ڤا نوكه‌ عیراق دكه‌ت دچیته‌ دناڤ پاكێجا سزایێن ئابۆری یێن عیراقێ ل سه‌ر هه‌رێما كوردستانێ” ئه‌ڤه‌ ژی بوویه‌ بابه‌ته‌كێ سیاسی” هه‌روه‌سا عیراقێ زالگه‌هه‌ك دانایه‌ به‌نداڤا مووسل و ئه‌و كه‌لوپه‌لێن ب رێیا ده‌رگه‌هێ ئیبراهیم خه‌لیل و حاجی عومران دهێن و دچنه‌ باژێرێن دیتر یێن عیراقێ” دیسان ئه‌و زالگه‌ها عیراقێ دانایه‌ باوه‌ مه‌حموود یاكو عێراقێ دانایه‌ ره‌خێ دیالا” كو ئه‌و كه‌لوپه‌لێن ب رێیا ده‌رگه‌هێن باشماخ و په‌روێزخان دهێن دڤێت د وێ رێدا ده‌رباز ببن” لدووڤ وێ نڤیسارا نڤێسینگه‌ها سه‌رۆكوه‌زیرێن عیراقێ” كو دڤێت هه‌موو به‌رهه‌مێن ناڤخۆیی یێن كوردستانێ ب رێیا زالگه‌ها كه‌ركووكێ بچنه‌ دناڤا ئاخا عیراقێ دا” ب مه‌رجه‌كی موله‌تا وان كۆمپانییێن هه‌رێمێ ل وه‌زاره‌تا بازرگانییا عیراقێ یان وه‌زاره‌تا چاندنێ یان ده‌سته‌یا وه‌به‌رهێنانا عیراقێ هاتبیته‌ تۆماركرن.

ناڤهاتی گۆت ژی: نوكه‌ ئه‌م ل سه‌ر خه‌تین ل گه‌ل وه‌زاره‌تا بازرگانییا عێراقی و ل گه‌ل جڤاتا وه‌زیران و جهێن شوله‌ژێ یێن حكومه‌تا هه‌رێما كوردستانێ ژی” داكو ئه‌ڤ بابه‌ته ل گه‌ل حكومه‌تا عیراقێ‌ بهێته‌ چاره‌سه‌ر كرن” دیسان مه‌ په‌یوه‌ندییێن به‌رده‌وام ل گه‌ل سه‌رۆكێن ژوورێن بازرگانی یێن عێراقی و ل گه‌ل سه‌رۆكێن بازرگانی یێن مووسلێ و دیالا” هه‌ر چه‌نده‌ هه‌تا نوكه‌ ئه‌م نه‌گه‌هشتینه‌ چ ئه‌نجامان” دیسان هه‌كه‌ ئه‌و رێنماییێن عێراقێ ده‌رێخستین ئه‌ڤه‌ بن” ئه‌م نه‌شێین ل سه‌ر رێنمایی و مه‌رجان كار بكه‌ین و ب ڤی ره‌نگی دێ زیانه‌كا مه‌زن گه‌هیته‌ بازرگانێن هه‌رێما كوردستانێ و دێ رێژا بێكارییێ ل هه‌رێما كوردستانێ زێده‌بیت” د هه‌مان ده‌مدا بازرگانێن مه‌ نه‌شێن به‌رهه‌مێن خۆ بتنێ ل بازارێن هه‌رێما كوردستانێ بفرۆشن” هه‌روه‌سا ئه‌ڤه‌ شه‌ش رۆژه‌ رێگری ل هنارتنا به‌رهه‌مێن بازرگانێن پارێزگه‌ها دهۆكێ بۆ عێراقێ هاتییه‌ گرتن و ناهێلن به‌رهه‌مێن بچنه‌ بازارێن عیراقێ.