هشیار زێبارى بڕیارەکا دەستەیا دادوەری یا کۆمسیۆنا هەلبژارتنێن عیراقێ بۆ دویرخستنا سێ حزبێن نێزیك ژ پە*كە*كێ ل هەلبژارتنێن خۆلا شەشێ یا پەرلەمانێ كوردستانێ ب كارەكێ ڕاست ناڤ دكەت و دبێژیت، ئەو سێ حزبە فاكتەرێ نەئارامی و ئاژاوەگێرییێ نە.
هشیار زێبارى، ئەندامێ دەستەیا کارگێرییا مەکتەبا سیاسییا پارتی دیمۆکراتی کوردستان ل هەژمارا خۆ یا تۆڕا جڤاكی یا ئێکس نڤیسییە، ” بڕیارا دەستەیا دادوەری ل کۆمسیۆنا بلند یا سەربەخۆیا هەلبژارتنان بۆ قەدەغەکرنا سێ حزبێن کوردی یێن سەر ب پە*كە*كا تورکیا د هەلبژارتنێن هەرێما کوردستانێ دا، بڕیارەکا ڕاست و ژیرانەیە، ژبەركو ئەو حزبە بووینە شانەیەکا پەنجەشێرێ د لەشێ هەرێما كوردستانێ و هەمی عیراقێ دا، ل گەل هندێ ژی فاكتەرەكێ نەئارامی و ئاژاوەگێڕییێ نە. “
دهێتە زانین، ژ ئێكی ڤێ هەیڤێ ڤە، دەستەیا دادوەرییا هەلبژارتنێن سەر بە جڤاتا بلند یا دادوەری ل عیراقێ، ل سەر داخوازا فەرمانگەها کاروبارێن حزب و ڕێکخراوێن سیاسی، بڕیار دا هەرئێك ژ حزبێن ( ئازادی دیمۆکراتی ئێزدی، بەرەیێ تێکۆشانا دیمۆکراتی و تەڤگەرا ئازادی ) بهێنە هەلوەشاندن و بارەگایێن وان بهێنە داخستن و دەست ب سەر كەلوپەلێن وان دا بهێتەگرتن.
ژێدەرێ بڕیارێ ژی ل سەر بنەمایێ سکالایەکا شیرەتكارێ ئاسایشا نەتەوەیی یا عیراقێ بوو کو ڕاگەهاندبوو، چالاکییێن وان حزبان پەیوەندی ب پە*كە*كێ ڤە هەنە د دەمەكی دا پە*كە*كە ژی حزبەکا قەدەغەکری یە ل عیراقێ.
