ڕێڤەبەرێ ڕاگەهاندنا فەرمانگەها كاروبارێن مینان ڕاگەهاند، ڕووبەرێ ئاخا مایە مینڕێژکری ل هەرێمێ و عیراقێ 2 هزار و 60 کیلۆمەترێن چوارگۆشەیە.
مستەفا حەمید، ڕێڤەبەرێ ڕاگەهاندنا فەرمانگەها كاروبارێن مینان ل وەزارەتا ژینگەها عیراقێ ڕاگەهاند، پڕۆسەیا پاقژكرنا ئاخا عیراقێ ژ مینان ل دویڤ ستراتیژییا هەڤپشك یا دەزگەهێ گشتی یێ كاروبارێن مینان یێ هەرێمێ و فەرمانگەها كاروبارێن مینان یا عیراقێ بۆ سالێن 2023-2028، یا بەردەوامە.
گۆت ژی: ژ سەرجەمێ 6 هزار و 600 کیلۆمەترێن چوارگۆشەیێن ئاخا مینڕێژکری یا عیراقێ و هەرێما کوردستانێ ژ سالا 2003، تیمێن وان شیاینە 4 هزار و 540 کیلۆمەتران پاقژبكەن، ڕووبەرێ ئاخا مینڕێژکری یێ مایی ژی 2 هزار و 60 کیلۆمەترێن چوارگۆشەیە. “
دیار ژی كر، ” د نوكەدا تیمێن مە كار ل سەر پاقژكرنا 400 بۆ 450 کیلۆمەترێن چوارگۆشە یێن دی ل هەمی پارێزگەهان دكەن. ”
جهێ گۆتنێ یە دەزگەهێ گشتی یێ کاروبارێن مینان ل هەرێما کوردستانێ و فەرمانگەها کاروبارێن مینان یا عیراقێ، ڕۆژا 9ـی ئابا 2023 د ڕێوڕەسمەكیدا ل بەغدا پلانا ستراتیژییا هەڤپشك یا نشتیمانی بۆ بەرنامێ کاروبارێن مینان و پاقژكرنا ئاخا هەردوولا ژ مین و پاشماوێن جەنگی ڕاگەهاند.
