خالد عەباس، بەرپرسێ ئۆفیسا دهۆكێ یا کۆمسیۆنا هەلبژارتنێن عیراقێ ئەڤرۆ ڕاگەهاند، ڕۆژا 16-09-2024 بانگەشا هەلبژارتنێن پەرلەمانێ کوردستانێ دێ دەستپێكەت و 24 دەمژمێران بەری دەنگدانێ بانگەشە دێ ب دووماهی هێت.
گۆرەی خشتەیێ کۆمسیۆنێ، دەنگدانا تایبەت ل 18ـیێ هەیڤا 10 دێ هێتە ئەنجامدان و 20ـێ هەیڤا 10 دەنگدانا گشتی دێ هێتە ئەنجامدان.
هەروەسا بۆ هەلبژارتنێن پەرلەمانێ كوردستانێ، 2 ملیۆن و 899 هزار و 578 کەسان مافێ دەنگدانێ هەیە، کو 2 ملیۆن و 683 هزار و 618 ژوان دەنگدەرێن گشتی نە و 215 هزار و 960 ژوان ژی دەنگدەرێن تایبەتن.
بۆ هەلبژارتنێن خۆلا شەشێ یا پەرلەمانێ کوردستانێ، 1431 بنگەهێن دەنگدانێ دێ هەبن، 1266 ژوان بنگەهێن دەنگدانا گشتی نە و 165 ژوان ژی بنگەهێن دەنگدانا تایبەتن.
