پەیاما لقێ ئێك د 36 مین سالڤەگەرا تاوانا ئەنفالێن بەھدینان؛
هەر ل دەستپێکا دامەزراندنا دەولەتا عیراقێ، گەلێ کوردستانێ کەتە بەر ستەم و زۆردارییا ڕژێمێن ئێك ل دویڤ ئێکێن عیراقێ و راستی هەمی شێوەیێن گرتن، ڕاکرن، کوشتن و تالانکرن و جینوسایدکرنێ بوون، هەمی پێخەمەت ژناڤبرن و سڕینا ناسنامەیا خەلکێ مە یا نەتەوەیی و نیشتیمانی، لێ کارەساتا ئەنفالان کو ئێکە ژ دڕندەترین پرۆسەیێن سەربازی یێن رژێما بەعسا ژ ناڤچووی، ل دژی خەلکێ سڤیل و بێ گونەهێ کوردستانێ ل سالا 1988 ئەنجامدای، شێوەکێ نوی و تایبەتێ هۆڤاتی و قڕکرنێ ب خۆڤە دیت و ب جۆرەکێ مەترسیدارێ جینوسایدێ ل ڤی سەردەمی دهێتە نیاسین.
تاوانا ئەنفالان ئێكە ژ بەرچاڤترین دیاردەیێن بنپێکرنا مافێ مرۆڤی و مەزنترین چامە، پشتی جەنگێ جیهانییێ ئێکێ، ژ لایێ ڕژێما بەعسا فاشی ڤە هاتیە ئەنجامدان، ژ بۆ سەرکوتکرنا بزاڤا نەتەوەیی و نیشتیمانی و ژناڤبرنا هەمی شەنگستەیێن گەلێ کوردستانێ یێن کەلتووری، دیرووکی، کۆمەلایەتی و ئابووی.
د ڤێ پرۆسەیێ دا هێزێن فەرمی یێن سەردەمێ رژێما بەعسا فاشی کو پێك دهاتن ژ فەیلەقا ئێکێ کو بارەگایێ وێ ل کەرکووکێ بوو، فەیلەقا پێنجێ کو بارەگایێ وێ ل هەولێرێ بوو، هێزێن ئەسمانی، هێزێن تایبەت، مغاویر، گاردا کۆماری، رێڤەبەرییێن ئەمن و هەولالگیری، یەکینەیێن تایبەتێن چەکێ کیمیاوی و بایۆلۆجی و سەرجەم دامەزراوەیێن دی یێن لەشکەری، پشکداری تێدا کر.
عەلی حەسەن ئەلمەجید، یێ ناسیار ب عەلی کیمیاوی، کو وی سەردەمی ئەمین سڕێ نڤێسینگەها باکوور یێ حزبا بەعسا فاشی بوو، هەروەسا وەکو فەرماندەیەکێ سەربازی ژی کاردکر، ژ لایێ سەدام حسێنێ دکتاتۆر ڤە، ب ئەنجامدانا ڤێ تاوانێ هاتبوو ڕاسپاردن. سولتان هاشم ژی، کو وەزیرێ بەرگریێ رژێمێ بوو، سەرپەرشتیا هەلمەتا سەربازی دکر.
پرۆسەیا ئەنفالان ب زنجیرە هێرشێن نەخشە بۆ کێشایێن سەربازی، ل ناوچە و دەڤەرێن جودا جودایێن کوردستانێ، ب هەشت قۆناغان، ل ناڤبەرا هەیڤا شواتا 1988 و هەتا دەستپێکا ئەیلۆلا هەمان سال هاتە بجهئینان.
قۆناغا هەشتێ و یا دووماهییێ، دەڤەرا بەهدینان (دهۆك، ئاکرێ، ئامێدیێ، زاخۆ و شێخان) کەتنە بەر ڤێ تاوانا مەزن و ژ 25-08-1998هەتا 06-09-1998 بەردەوام بوو و ب سەدان گوندێن ڤێ دەڤەرێ کەتنە بەر بومبەبارانا چەکێ کیمیاوی و ئاگرێ تۆپ و فڕۆکەیێن ڕژێمێ و ب هزاران خەلکێ سڤیل هاتنە گرتن و بێ سەروشوینکرن و ب دەهان هزار ژی ئاوارەیی سەر سنوورێن تورکیا و ئیرانێ بوون.
ژ ئەنجامێن ڤێ پرۆسەیا هۆڤانە زێدەتر ژ 182000 کوردستانی بوونە قوربانی، هەروەسا تەڤایا ئەو گوندێن کەتینە بەر ئەڤێ پرۆسەیێ هاتنە وێرانکرن و سۆتن، کو زێدەباری خانی و سەروەت و سامان، رەز و باغێن خەلکی، ب سەدان هزار دۆنەمێن دارستانان، هزاران مزگەفت، دێر، قوتابخانە و شینوارێن دیرووکی هاتنە ژناڤبرن و تۆبۆگرافیا کوردستانێ ب تەمامی هاتە تێکدان.
هەر چەندە کو پرۆسەیا ئەنفالان ل گۆرەی پیڤەرێن جیهانی، تاوانەکا نیڤدەولەتی یە و ب تاوانا کۆمەلکۆژی دهێتە هەژمارتن، لێ سازیێن نیڤدەولەتی، و وەلاتێن زلهێز، چ هەلویستەك نەبوو و بێدەنگی، بەرامبەر ڤێ چاما مەزنا دەرحەقێ گەلێ کوردستانێ دا، ژ لایێ رژێما سەدام یا ژناڤچووی ڤە هاتیە کرن هەلبژارت.
خۆشبەختانە، ل 5ـێ کانوونا دووێ یا سالا 2012ـێ بۆ جارا ئێکێ پرۆسەیا ئەنفالان ژ لایێ پەرلەمانێ سویدی ڤە ب پرۆسەیەکا کۆمەلکوژی بەرامبەر کوردێن باشوورێ کوردستانێ هاتە نیاسین.
پشتی ژ ناڤچوونا ڕژێما ستەمکارا سەدام ژی، حکومەتا عیراقا فیدرال، ژبۆ قەرەبووکرنا زیانڤێکەفتێن دەستێ ڕژێما دکتاتۆری، ب بەرپرسیارییا خۆ یا دەستووری و یاسایی نەڕابوویە و چ گاڤێن ئەرێنی بەرامبەر سڤککرنا رەوشا دەروونی و ئێش و ئازارێن قۆربانیێن ئەنفالان نەهاڤێتینە.
د دەمەکی دا کو ئەم ڤێ کارەستا مەزن ب بیردئینین، هەمی تاوانبارێن راستەوخۆ و نەڕاستەوخۆ یێن دەست د ڤێ مەرگەساتا مەزن دا هەی، مەحکۆم و شەرمزاردکەین و داخوازێ ژ کۆمەلگەها نیڤدەولەتی و هەمی وان کۆمپانیایێن تەکنۆلۆژیا سەربازی دایە ڕژێما ژ ناڤچوویی دکەین، دان پێدانێ ب ڤێ تاوانێ مەزن بکەن و فشارێ ل سەر حکومەتا عیراقێ چێکەن ژبۆ قەرەبووکرنا کەس و کارێن ئەنفالکریان، کوردێن فەیلی، بارزانی، خەلکێ دەڤەرا بەهدینان، هەلەبچەیا شەهید و ئێزدی و هەمی زیانڤێکەفتیێن ئەنفالان، وەکو ئەرکەکێ دەستووری و یاسایی و ئەخلاقی.
ل دووماهیێ داخوازێ ژ خەلکێ کوردستانێ دکەین، نەخاسمە گەنج و لاوێن دەستێ تاوانا رژێما ژ ناڤچوویی نەگەهشتێ، پتر دهشیاربن و دیرۆکا گەلێ خۆ باشتر ڤەکۆلن و ڤان چام و تاوانێن هۆڤانە ژبیرنەکەن و پتر گرێدایی گەل و وەلاتێ خۆ و بهایێن خۆ یێن نەتەوەی و نیشتیمانی بن و ئازادیا ئەڤرۆ ل کوردستانێ، کو بەرهەمێ خوینا سەدان هزار شەهیدایە بپارێزن، چونکە ئەونفشێ پاشەڕۆژێ نە و هێزا پۆلایین یا گەل و وەلاتێ مە نە و دا جارەکا دی دەستێ چەپەلێ دوژمنێن گەلێ مە ب خۆینا خەلکێ کوردستانێ سۆرنەبیتەڤە.
هزار سلاڤ ل گیانێ پاقژێ شەهیدێن تاوانا ئەنفالان
هزار سلاڤ ل گیانێ پاکێ هەمی شەهیدێن کورد و کوردستانێ
هەر بەرز و بلندبیت ئالایێ کوردستانێ
کوردستان هەرا ئارام و ئاڤەدان بیت
لقێ ئێکێ پارتی دیموکراتی کوردستان
