ده‌قێ په‌یاما نێچیرڤان بارزانى سه‌رۆكێ هه‌رێما كوردستانێ:
ئه‌ڤرۆ بیره‌وه‌رییا خه‌مگینا (36) سالییا ئه‌نفالا بادینان ل بیرا خۆ دئینین كو ل 25ى ته‌باخێ هه‌تا شه‌شى ئه‌یلولا 1988ێ د دووماهى قووناغا ئه‌نفالێدا، خه‌لكێ سڤیل و ئاڤ و هه‌وا و ئاخ و سروشتێ ده‌ڤه‌رێ ڤه‌گرت، سلاڤ ل گیانێ پاقژێ ( 182 ) هزار ئه‌نفالكرییێن كوردستانێ ژ گه‌رمیان هه‌تا دووماهى گوندێ بادینان بووینه قۆربانییێن تاوانێن ڕژێما وى ده‌مییا عیراقێ.
دادگه‌ها بلندا تاوانێن عیراقێ ئه‌نفال ب جینوساید و تاوانێن شه‌رى و تاوانێن دژى مرۆڤایه‌تییێ دانه‌نیاسین، له‌وما دووباره داخوازێ ژ حكومه‌تا عیراقێ دكه‌ین ژ هه‌موو لایانڤه كه‌سوكارێن ئه‌نفالاكرییان قه‌ره‌بوو بكه‌ن، ل هه‌رێما كوردستانێ ژى دڤێت خزمه‌ته‌كا باشتر پێشكێشى كه‌سوكارێن وان یێن سه‌ربلند بهێنه‌كرن، له‌وما دێ ل سه‌ر بزاڤێن بۆ ب جینوساید ناساندنا ئه‌نفالێ ل سه‌ر ئاستێ نێڤده‌وله‌تى د به‌رده‌وامبین.
هه‌رێما كوردستانێ و مافێن وێ یێن ده‌ستوورى، به‌رهه‌مێ گیانێ پاقژ و خوینا هزاران شه‌هیدان و ڕوندكێن هزاران دایكێن جه‌رگ سووتى و ئه‌نفال و كیمباران و خه‌بات و قوربانیدانا كوردستانێنه، له‌وما ئه‌ركێ مه هه‌موویانه ب هه‌موو شێوه‌یان پارێزگارییێ لێ بكه‌ین، دڤێت زێده‌بارى هه‌موو ئاریشه و ناكۆكییان، نیشتیمان ئارمانج و كۆمڤه‌كه‌را هه‌موویان بیت.
دڤێ هه‌لكه‌ڤتێدا دووپات دكه‌ین كو دڤێت ل عیراقێ په‌ند و وانه ژ ڕابردووى بهێنه وه‌رگرتن و مافێن هه‌موو پێكهاته‌یان دپاراستى بن، بۆ هندێ ئه‌م هه‌موو پێكڤه بشێین پاشه‌رۆژه‌كا باشتر بۆ نڤشێن نوكه و داهاتى مسۆگه‌ر بكه‌ین.
