نێچیرڤان بارزانى: ئاشتى هه‌ورامى ب ژێهاتى و دلسوزى خزمه‌تا هه‌رێما كوردستانێ كر

سه‌رۆكێ هه‌رێما كوردستانێ دبه‌هینامه‌یه‌كێدا بۆ وه‌غه‌ركرنا ئاشتى هه‌ورامى دیاركر، ئه‌وى ب ژێهاتى و دلسوزى خزمه‌تا هه‌رێما كوردستانێ كر، رۆله‌كێ مه‌زن د بنیاتدانانا ژێرخانه‌ و پێشڤه‌برنا كه‌رتێ په‌ترۆلا هه‌رێما كوردستانێدا گێرا.
ئاشتى هه‌ورامى دكابینه‌یێن شه‌شێ، حه‌فتێ و هه‌شتێ یێن حكومه‌تا هه‌رێما كوردستانێدا وه‌زیرێ سامانێن سروشتى بوو، هه‌روه‌سا د كابینه‌یا نه‌هێ ژیدا هاریكارێ سه‌رۆكوه‌زیران بۆ كاروبارێن وزێ بوو، دووهى پشتى نشته‌رگه‌رییه‌كێ، وه‌غه‌ركر.
نێچیرڤان بارزانى سه‌رۆكێ هه‌رێما كوردستانێ دبه‌هینامه‌یه‌كێدا سه‌ره‌خۆشى ل مالباتا د. ئاشتى هه‌ورامى كر و دیاركر، سه‌ره‌خۆشییێن كوور ئاراسته‌ى بنه‌مال و كه‌سوكارێن وى دكه‌ت، هه‌ڤسوز و هه‌ڤپشكێ خه‌ما وایه‌، ژ خودایێ مه‌زن دخوازیت گیانێ وى ب مه‌زنى و دلوڤانییا خۆ شاد بكه‌ت، ئارامى و بێهنفره‌هییێ ب هه‌موو لایه‌كى بده‌ت.
ل دۆر كار و ئه‌ركێن ویژى سه‌رۆكێ هه‌رێما كوردستانێ ئاشكراكر، خۆدێ ژێ ڕازى ئاشتى هه‌ورامى ب ژێهاتى و دلسوزى خزمه‌تا هه‌رێما كوردستانێ كر، ب شاره‌زایى و بسپورى و شیانێن خۆ، ڕۆله‌كێ مه‌زن د بنیاتدانانا ژێرخانه‌ و پێشڤه‌برنا كه‌رتێ په‌ترۆلێدا ل هه‌رێما كوردستانێ گێران.