ل شوونا نڤێژا بارانێ

1. ئاڤا ژ سۆندەیێ مالێن مە دەردكەڤت گەلەك پارە لێ ھاتنە مەزاختن دا ب كێری ڤەخوارنێ بھێت، وەرن دا وێ ب شۆشتنا كۆلانێ ڤە نەمەزێخین. نەمازە ژبۆ دینداران دبێژم. ل چەند جھان د قورئانێ دا ھاتیە كۆ خودێ ژ وان یێن كۆ ئیسرافێ دكن حەز ناكت.
2. د دەما كڕین ئان فرۆتنا تشتەكی دا ھەما ب دەرەو و ب ڕاست ژی وەرن دا ژبۆ چەند فلسەكان ناڤێ خودێ نەئینین د ناڤ بازاڕی دا.
3. د دەما ڕاگرتنا تڕمپێلێ دا ڕێیێ ل خەلكی تەنگ نەكین.
4. د دەما ھاژۆتنا تڕمپێلێ دا ڕێزێ ل ھاژۆتنكارێن دی بگرین.
5. د دەما ڕِاوەستیانا د سریەیێ دا، ل داییرەیا ھاتنووچوونێ بت ئان ل فڕنی یا نانی، ڕێزێ ل مافێ خەلكی بگرین.
6. دیندار بین ئان بێ-دین، خودێباوەر بین ئان خودێ-نەباوەر، فەرق ناكت، ڕێزێ ل وەختێ خوە بگرین و زڕكرنا وەختێ خوە ل سەر تەلەفۆنێن دەستان كێمتر بكین. ھندی ژ مە دھێت بخوینین، كتێبێن باش بخوینین. كتێبخواندن باشترە ژ فلمان و باشترە ژ تیكتۆكێ ژی.
7. خوە ژ دەرەوێ بدین پاش.
8. ھەر كارەكێ دكین ب دلسۆزی بكین. ئەم فەڕاشێ وەزارەتا شارەداریان بین ئان وەزیرێ شارەداریان ب خوە بین فەرق ناكت.
9. شكرانی یا نەعمەتێن مە ھەنە بكین دا خودێ ھێشتا بدت مە، ئێك ژ وان نەعمەتان ھەر ئەو ئاڤە یا مە گۆت ھەما ب ھەونتە نەمەزێخین. ئێك ژ وان نەعمەتان نەعمەتا تەناھیێ یە، ل گەلەك جھان (ھەما ل ئیرانێ، وەكی نموونە) مرۆڤ نكارت بۆ سەعەتەكێ ژی تڕمپێلا خوە ل كۆلانێ بھێلت، تە ھند دیت ئێكی دزی.
10. ڕێزێ ل دایبابێن خوە بگرین، ڕەحمێ ب زارۆان دا ببین، چاڤێ مە ل ھێتیمان و ھەژاران بت.