کومیتا ناڤەندی یا پارتی ب سەرپەرشتیا سەرۆک بارزانی کۆمبوو و دانوستاندن ل سەر چەند پرس و تەوەرا کرن
کومیتەیا ناڤەندی یا پارتی دیموکراتێ کوردستانێ ب سەرپەرشتیا سەرۆک بارزانی کۆمبوو و چەند پرس و تەوەرێن تایبەت ب ئاریشە و گۆهورینێن ئاستێ جیهان و دەڤەرێ، گوهۆرینێن سووریا و کارتێکرنا وان ل سەر دەڤەرێ ب گشتی و کوردستانا سووریا ب تایبەتی، پرۆسەیا ئاشتییێ ل تورکیا و سەرەدانا شاندێ دەم پارتی بۆ هەرێما کوردستانێ، رویدان و گۆهورینێن لوبنانێ، پەیوەندییێن پارتی دگەل لایەنێن سیاسی یێن عیراقێ، بابەتێ پێکئینانا کابینەیا دەهێ یا حکومەتا هەرێما کوردستانێ و دانوستاندن و گاڤێن دانوستاندنێ و بابەتێن ناڤخۆیی یێن پارتی گۆتوبێژکرن.
دەقێ ڕاگەهاندنا کومیتەیا ناڤەندی یا پارتی دیموکراتێ کوردستانێ:
ب سەرپەرشتیا جەنابێ سەرۆک مەسعود بارزانی، کومیتەیا ناڤەندی یا پارتییا مە، ب ئامادەبوونا هەڤالێن کومیتەیا ناڤەندی و بەرپرسێن لقان، ئەڤرۆ شەمبی، 15ـی شوباتا 2025ـێ کۆمبوونا خو یا بەرفرەهــ ئەنجامدا.
کۆمبوون ب دەمەکی ڕاوەستان بۆ رێزگرتن ل گیانێ پاک یێ شەهیدێن کوردستانێ، سەروەرێ وان بارزانیێ نەمر و کاک ئیدریسێ هەردەم ل هزرا مە دەستپێکر، پاشی چەند پرسێن دەڤەری و جیهانی و بابەتێن گرێدای ب رێکخستنا ناڤخۆیی گۆتووبێژکرن و بریارێن پێدڤی هاتنە وەرگرتن.
تەوەرێ ئێکێ/ ئاریشە و گوهۆرینێن ئاستێ جیهان و دەڤەرێ
رویدانێن شەرێ غەززە و هەلویستێ حکومەتێن ئەمریکا، ئۆرۆپی و عەرەبی و ئەنجامێن شەڕ و ئالوزیان بۆ هەردوو لایەنێن شەڕکەر و کاریگەرییا ل سەر پرسا فەلەستینێ و ڕەنگڤەدانا وێ ل سەر ژیان و پاشەڕوژا کەرتێ غەززە ب تایبەتی و فەلەستینێ ب گشتی هاتنە بەرباس و دانوستاندن ل سەر هاتنە کرن.
تەوەرێ دووێ/ گوهۆرینێن سووریا و کارتێکرنا وان ل سەر دەڤەرێ ب گشتی و کوردستانا سووریا ب تایبەتی
ئەنجامێن کەڤتنا رژێما بەعس ل سووریا و هاتنا سەر دەستهەلاتا لایەنێن بەرهەلستکار ب سەرۆکایەتیا (ئەحمەد شەرع) روهنکرن هاتنە کرن، هەمی لایەنێن ڤێ گوهۆرینێ هاتنە شروڤەکرن، هەروەسا کارتێکرنا لایەنێن دویر و نێزیک یێن دەرڤە ل سەر چاوانییا ب رێڤەبرنا سووریا یا نوی و ئاراستەیێ سیاسی یێ ئەڤێ دەستهەلاتا نوکە و چاوانییا مامەلەکرنا وێ دگەل پێکهاتەیێن نەتەوەیی و ئولی یێن وەلاتی ژ لایەکی و ژ لایەکێ دی چاوانییا مامەلەکرنا دەستهەلاتا نوی ل هەمبەر چارەسەرکرنا ئاریشەیا کورد و ب دووماهیئینانا پێشێلکرنا مافێن کورد ل داهاتیدا، دانوستاندن ل سەر هاتنە کرن.
هەروەسا کۆمبوونا جەنابێ سەرۆک بارزانی دگەل فەرماندارێ هێزێن هەسەدە، هەڤدەم هەمی بزاڤێن جەنابێ سەرۆکی بۆ نێزیککرن و پێکڤە کارکرنا لایەنێن کوردی یێن سووریا ژ پێخەمەت پێکڤەبوونێ، کو پشکەکا سەرەکی بن د دانوستاندنێن دامەزراندنا سووریا یا نوی دا، ب گرنگ و ئارمانجدار هاتنە هەلسەنگاندن، لایەنێن ئەرێنی و نەرێنی یێن گۆهورینا سووریا ل سەر پەیوەندیێن وەلاتێن دەڤەرێ ژی خواندنا پێدڤی بۆ هاتە کرن.
تەوەرێ سێیێ/ پرۆسەیا ئاشتییێ ل تورکیا و سەرەدانا شاندێ دەم پارتی بۆ هەرێما کوردستانێ
ئەڤ پرۆسەیا گرنگ و کاریگەر پێدڤی ب ڕێخۆشکرن و هەڤ هزری و هەڤکارییێ یە، ئەوا ژ مە بهێت و پێدڤی بیت و ژ مە بهێتە خواستن ئەم دێ هەڤکار و ڕێخۆشکاربین، د ڤی واری دا ب ئەرکێ هەمی لایەنان دزانین بەرژەوەندیا نەتەوەیی و جڤاکی بێخینە سەر هەمی بەرژەوەندیێن دی.
تەوەرێ چارێ/ رویدان و گوهۆرینێن لوبنانێ
پشتی بەرهەنگاربوونێن حزبوللا یا لوبنانی و دەولەتا ئیسرائیلێ، ئاستێ شەڕ و پێکدادانان و کارتێکرنا وان ل سەر ئاکنجییێن لوبنانێ هەمیێ و کۆچا ب کۆم یا لوبنانیان بۆ دەرڤە، هەروەسا مامەلەیا وەلاتان دگەل ئەڤی ڕەوشا نەباش و کریارێن خوینداری، گۆهورین د دیتن و بۆچوونێن لایەنێن سیاسی یێن جودا جودا یێن لوبنانێ دروستکر، پشتی رێککەڤتن و ئاگربەستێ پەیوەندیێن ناڤخۆیی و دەرڤە یێن لوبنانێ گۆهورینێن بنەرەتی ب سەر دا هاتن، ب جۆرەکی هەڤهێل دگەل ئاگربەستێ دا، سازییێن وەلاتی (سەرۆکێ لوبنانێ و حکومەت) کو دەمەکێ درێژبوو ئاستەنگ بۆ وان هاتبوونە دروستکرن، هاتن هەلبژارتن و دەستبکاربوون، ئەڤ زەمینە و کارابوونا سازییان کارتێکرنا مەزن هەبوو ل سەر ڤەکۆلینا پەیوەندیان دگەل وەلاتێن جیران و ڕول و پەیوەندیێن حزبوللا د دەڤەرێ دا.
تەوەرێ پێنجێ/ پەیوەندیێن پارتییا مە دگەل لایەنێن سیاسی یێن عیراقێ
هەر ژ دەستپێکا دامەزراندنا کابینا بەرێز (محمد شیاع سوودانی) ل سەر بنگەهـێ رێککەڤتنا سیاسی و ئیداری دگەل لایەنێن چوارچووڤەیێ هەماهەنگی و لایەنێن سوننی، بزاڤێن مە ب ئاراستەیێ پشتەڤانییا حکومەتێ بۆ ب رێڤەچوونا کار و خزمەتا خەلکی و بجهئینانا کارنامەیا حکومەتێ بوویە، دەربارەی بودجە و مووچەیێن فەرمانبەرێن هەرێما کوردستانێ و بجهـ نەئینانا بڕگەێن رێککەڤتنان، د کۆمبوونێدا دووپاتی ل سەر چارەسەرکرنا ئاریشەیان ژ رەوانگەها دەستوور و رێککەڤتنان کریە، د کۆمبوونێدا هاتیە تەکەزکرن کو شایستەیێن دارایی و مافێن دەستووری یێن هەرێما کوردستانێ ب سیاسی نەهێنە کرن و ماددەیێن دەستووری وەکی ئەوێن د دەستووری دا هاتین خواندن بۆ بهێنە کرن و بهێنە بجهئینان، هەروەسا د کۆمبوونێدا پشتەڤانییا خۆ بۆ بزاڤ و گاڤێن حکومەتا هەرێما کوردستانێ دووپاتکرن بۆ چارەسەریا هەردەمی یا ئاریشەیان.
تەوەرێ شەشێ/ بابەتێ پێکئینانا کابینەیا دەهێ یا حکومەتا هەرێما کوردستانێ و گۆتووبێژ و گاڤێن دانوستاندنێ
پشتی ئەنجامدانا هەلبژارتنان ل 20ــێ چریا ئێکێ یا 2024ــێ، پارتیا مە لژنەیەکا بلند یا تایبەت بۆ دانوستاندنێ دگەل لایەنان پێکئینا و پشتی ڕاگەهاندنا ئەنجامێن هەلبژارتنان لژنا مە سەرەدانا هەمی وان لایەنێن سیاسی یێن پشکداری د هەلبژارتنان دا کرین کر، هزر و بۆچوون گۆهورین و ڕێخۆشکرن بۆ کۆمبوون و دەستبکاربوونا پەرلەمانی و پێکئینانا کابینا نوی د چەندین گەرێن کۆمبوونان دا لێکتێگەهشتن و لێکنێزیکبوون دروستبوو و ل سەر گەلەک بابەتێن سیاسی و ئیداری دگەل یەکێتی نیشتمانی یا کوردستانێ هەڤرایی دروستبوویە و پێدڤی ب دانوستاندنێن زێدەتر هەیە کو د ئەڤێ حەفتیێدا دێ دەستپێکەت و چاڤەرێ دکەین ل دەمەکێ نێزیک مزگینیا پێکئینانا سەرۆکاتیەتیا پەرلەمانی و کابینەیا نوی ل سەر بنگەهێ ئێک هەرێم، ئێک حکومەت، ئێک هێزا لەشکەری بهێتە ڕاگەهاندن.
تەوەرێ حەفتێ/ بابەتێن ناڤخۆیی یێ پارتیا مە
-بابەتێ پرۆسەیا هەلبژارتنا ئورگانێن پارتیا مە ل سنوورێ هەر سێ مەکتەبێن رێکخستنێ یێن پارێزگەهێن نەینەوا و کەرکوک و گەرمیان و بەغدا، کو ل دویڤ پەیرەوێ ناڤخویی یێ پارتیا مە و د چوارچوڤا رێنماییان دا ئەڤ پرۆسەیا گرنگ ب سەرکەڤتی هاتە ئەنجامدان و ب دووماهی هات.
-بابەتێ پەیمانگەها پێگەهاندنا کادران، ژ روانگەیا گرنگیدان ب پرۆسەیا رەوشەنبیرکرن و پێگەهاندن و شیاندنا کادران، بیستەمین خولا پەیمانگەها کادران ل دویڤ پلان و پرۆژەیەکێ سەردەم و نوی دێ هێتە ڤەکرن، د کومبوونێ ئەڤ بڕیارە ب گاڤەکا پێدڤی زانی.
