ب هەلكەفتا ههشتێ ئادارێ، ڕۆژا جیهانییا ئافرهتان، ب گهرمى پیرۆزباهییێ ل ههموو ئافرهتێن كوردستانێ و عیراقێ و جیهانێ دكهم و هیڤییا پێشكەفتن و سهركەفتنا زێدەتر بۆ دخوازم د بزاڤ و خهباتا وان دا بۆ بدەستڤەئینانا دادپهروهری و یهكسانییێ. ههموو پشتەڤانییەكێ ژی بۆ بهردهواميیا ڕۆلێ وان یێ كارتێكەر د ئاڤاكرنا كومەلگەهەكا ئازادتر، دادپهروهرتر و پێشكهفتیتر، دووپات دكهم.
ژنان ل كوردستانێ ب درێژاهییا دیرۆكێ، د گۆڕهپانا خهباتا سیاسی و بهرههنگاربوونێ، ههروهسا د گشت بوارێن ژیانێدا ئامادهيى و ئازایهتی و خۆڕاگريیا خۆ سهلماندییه و پشكەكا نەڤەقەتییای بووینه ژ كاروانێ ئازاديیا كوردستانێ، ئهڤرۆ ژی بهردهوامه ل سەر ڕۆلێ خۆ د سیاسهتێ و ئابووری و ڕێڤەبرن و پهروهردەكرنێدا و ب كارايى پشكدارییێ د ههموو بیاڤێن ژیانێدا دكەت. ئەم شانازییێ ب پێگەهـ و دهستكەفتێن ئافرهتێن كوردستانێ دكهین، لێ ئەوێ ژی دزانین كو بۆ مسۆگهركرنا ماف و پاراستنا وان ژ تۆندوتیژی و جیاكارییێ، ههروهسا بهێزكرنا پێگەهێ وان د ههموو بواراندا، كارێ هەمەلایەنی و زێدەتر پێدڤییە.
دوماهیئینان ب تۆندوتیژییا دژی ژنان، پاراستنا مافێن وان و دابینكرنا ژینگەهەكێ كو پشكدارییا وان یا یەكسان د ههموو بیاڤێن ژیانێدا مسۆگهر بكەت، بهرپرسیارهتییهكا گشتییه ل سهر مە ههموویان وهك كهس، خێزان، پهروهرده و د گشت سازى و د جڤاكیدا، كو بزاڤێن زێدەتر بكهین بۆ پشتڕاستبوون ژ وێ چەندێ كو كوردستان نموونهیهك بیت ژ یهكسانی، دادپهروهری و مافێن مرۆڤی. ههروهك هەردەم مە دووپاتكری، ئاڤاكرنا جڤاكهكێ دیمۆكراسی و پێشكهفتی بێ مسۆگهركرنا ماف و ئازاديیا ژنان و بهێزكرنا ڕۆل و پێگههێ وان د ههموو بیاڤاندا، ناهێتە دی.
د ڤێ یادێ دا، ب ڕێزڤە هەموو وان ئافرەتێن قوربانيێن مەزن داین و ئەوێن بووینە قوربانيێن تۆندوتیژی و تۆندڕهوییێ، ل بیر دئینین. پابهنديیا خۆ یا بهردهوام دووپات دكهین بۆ چهسپاندنا كەلتوورێ پێكڤهژیان، لێبورین و یهكسانی. ههر چ ژ دەستێ مە بهێت كێمتەرخەمییێ ناكهين بۆ ئاڤاكرنا كۆمەلگەهەكێ كو تێدا ژن هەڤپشكەكێ ڕاستهقينه بیت ل دروستكرنا پاشەڕۆژێدا.
سلاڤ بۆ ههموو ئهو ئافرهتێن ل پێناڤی مافێن خۆ دا خهباتێ دكهن.
