ب هەلكەفتا ڕۆژا ڕۆژنامەگەرییا كوردی نێچیرڤان بارزانی، سەرۆکێ هەرێما کوردستانێ، پەیامەك بەلاڤكر.
دەقێ پەیاما نێچیرڤان بارزانی:
” یادا 127 سالییا دەرچوونا ڕۆژناما ( کوردستان ) ژلایێ میر ميقداد ميدحهت بەدرخانڤه، ههروهسا یادا 27 سالییا دامەزراندنا سەندیکا ڕۆژنامەنڤیسێن کوردستانێ، ب گهرمى ل هەموو ڕۆژنامەنڤیس و ميدياكارێن کوردستانێ پيرۆز دکەم، هيڤییا پێشكهفتنا زێدەتر و سهركەفتنێن بهردهوام بۆ دخوازم.
د ڤێ هەلكەفتێدا، دووپاتییێ ل سەر پابەنديیا خۆ ب ئازاديیا ڕۆژنامەگەرییێ و ڕادەربرینێ و گرنگییا و پاراستنا ووشەیێن ئازاد وەک ئێك ژ بنەمایێن سهرهكييێن دیمۆکراسی و پێشکەفتنێ و كۆمەلگەهەكا تهندروست، دكهين. دێ بهردهوام كاركەین بۆ دابینكرنا ژینگەهەكا گۆنجای بۆ کارێ ڕۆژنامەنڤیسان كو تێدا ب دەستكەفتنا زانیارییان یا مسۆگەر بیت و ژ ههموو کۆت و بەند و ئاستەنگان یا دوور بیت، ههروهسا هەر پێشێلکارییەکا د چارچووڤێ یاسایا ڕۆژنامەگەریدا، بهێتە چارەسەر كرن.
باوەرا مە ئەوە ڕۆژنامەگەريیا ئازاد، وێرەك ، بەرپرسیار و ڕهخنهگر، هەڤپشكەكا سەرەکییە د ئاڤاكرنا کوردستانەکا دادپەروەرتر و پێشکەفتیتر دا، لەوما د ڤێ بیرەوەرییێدا وهك هەردەم ڕۆژنامەنڤیسان هان ددەین پابەندی پیشەیبوون و بێلایەنی و ڕاستگۆییێ بن و ژ زێدەڕۆی و گۆتارێن دژوار دوور بکەڤن و بەرژەوەنديیا گشتيیا وەلاتی و ئاشتيیا جڤاكی ل بەری هەموو تشتی بدانن و ڕۆلێ خۆ یێ كارا د موكمكرنا كەلتوورێ فرهڕهنگى و پێكڤەژيانێ و ئێكدووقەبوولكرنێ و لێبوورینێدا، بگێڕن.
