دەقێ راگەهاندنا كۆمبوونا كۆمیتا ناڤین یا پارتی ب سەرپەرشتییا سەرۆک بارزانی:

ئەڤڕۆ کۆمبوونا بەرفرەها کۆمیتا ناڤین یا پارتی دیموکراتی کوردستان ب سەرپەرشتیا سەرۆک مەسعود بارزانی هاتە ئەنجامدان و کۆمبوونێ پێنج تەوەر ب خۆڤە دگرتن:

تەوەرێ ئێكێ.. پەیوەندیا مە دگەل حكومەتا فیدرالی

پارتیا مە د قووناغا بەرهنگاربوونا رژێما پێشتر ژی د ئاڤاكرنا عیراقا نوودا كو تێدا هەمی وەلاتی هەست ب ئارامی و ئاسۆدەییێ بكەن، ل گۆری دەستوری ب ماف و ئازادیێن خوە بگەهن، عیراقەك كو بێی جوداهیا نەتەوەیی و ئایینی و مەزهەبی بۆ هەمووان بیت و رۆلەكێ كاریگەر هەبیت، سەركردایەتیا گوردستانێ ب بریارا پەرلەمانێ كوردستانێ پشكداریا دامەزراندنا عیراقا نوو كر، لسەر بنەمایێ هەڤپشك و سازان و هەڤسەنگیێ بیت “شراكة، توافق، توازن” ب رێڤەبرنا عیراقێ ژلایێ هەمی پێكهاتەیانڤە ل گۆر دەستورێ هەمیشەییێ عیراقێ و دابینكرنا ژیانەكا شایستە بۆ هەمی خەلكێ عیراقێ كو ببیتە جهێ قەرەبووكرنا هەمی نەهامەتی و وێرانكاریێن لسەر عیراقێ ب تایبەتی كوردستانێ دا هاتین، ب مخابنیڤە پشتی دەربازبوونا چەندین سالان ل كەڤتنا رژێما بەرێ، پشكەك ژ دەستهەلاتدارێن بەغدا ب عەقلیەتا دوور ژ عەقلیەتا فیدرالی و ب ئاراستێ ڤەگەریانێ بۆ دەولەتا مەركەزی و پشتگۆهـ هاڤێتنا دەستوری و رێكەڤتنێن دناڤبەرا لایەنێن سیاسی هاتینە ئەنجامدان بۆ پێكئینانا كابینە و فشار ئێخستنا لسەر هەرێمێ ب هەمی شێوەیەكێ و بكارئینانا كارتا موچەیی و بۆدجەیێ هەرێما كوردستانێ پێنگاڤان ب هاڤێژیت، کۆمبوونێ پەسەند و پشتەڤانییا هەلویستێ مەکتەبا سیاسىیا پارتییا مە کر دەربارەیی موچەیێ موچەخۆرێن کوردستانێ، هەروەسا هەلویستێ حزبێن کوردستانی د کۆمبوونا هەڤپشكا 31ـی گولانا 2025 ێ” بلند نرخاند، پشتی ئەوا ئاماژا ئەرێنی یاکو هەیی ژ لایێ حکومەتا فیدرالى و دامەزراوەىا قەزائى بۆ چارەسەرکرنا وێ ئاریشێ ئەم ژی داکۆکیێ ل چارەسەرکرنا کێشان دكەین و دووماهی ئینان ب ڤی شێوێ ڕەفتارا نە دادپەروەرانەیا كو ل گەل ژیارا فەرمانبەر و موچەخۆرێن کوردستانێ دهێتە كرن.

تەوەرێ دووێ” پەیوەندییێن مە ل گەل هێز و لایەنێن سیاسی یێن کوردستانی؛ پارتییا مە باوەڕىیا تەمام ب فرە حزبى و ل گەل دا ب کارێ هەڤپشك و بەرپرسیاریەتىیا هەڤپشك هەیە، د ڤی واری دا مە بزاڤا ڕێکخستنا ناڤمالا کوردستان بەردەوام هەبوویە و مە بزاڤێن جددی دان بۆ دروستکرنا هەڤپەیمانیەكا کوردستانى بۆ پشكدارییێ د هەڵبژارتنێن بهێن یێن خولا شەشێ یا جڤاتا نوونەرێن عێڕاقێ بۆ هندێ ل بەغدا وەکو پێکهاتێ کورد مە ڕۆلەكێ کاریگەرتر هەبیت، نەکو وەکو ئەحزاب، بەلێ مخابنی پێشوازى ل وێ بزاڤا مە نەهاتە كرن و بێ ئەنجام بوو.
دووماهی بزاڤا مە بۆ کارێ پێکڤەیى و دروستکرنا ب هەڤڕا بەرامبەر کێشە و تەحەدیاتان ئەوبوو کو مە داخواز ژ هەموو پارت و لایەنێن کوردستانی کر و مە مێهڤان كرن بۆ کۆمبوونەكا هەڤپشك کو ب سوپاسیڤە بەشێ هەرە زۆر یێ حزب و لایەنان ئامادەیی کۆمبوونێ و گوتۆبێژکرنێ بوون هەڤدەم چەند لایەنان دەستپێشخەریا مە قەبوول نەکر و کو ئارمانج ژێ ڕاوێژ و گوهۆرینا بۆچوونان بوو دەربارەیى بڕیارە نە یاساییا وەزارەتا دارایىا حکومەتا فیدرالی سەبارەت ماف و شایستەیێن دارایی یێن موچەخۆران ب تایبەتى و خەلكێ هەرێما کوردستانێ ب گشتى، جهێ ئاماژێیە کۆمبوونا ناڤهاتی کۆمبوونەكا باش و سەرکەفتی بوو.

تەوەرێ سێیێ/ سەرەدان و كۆمبوونێن سەرۆكێ حكومەتا هەرێما كوردستانێ بۆ ویلایەتێن ئێگرتیێن ئەمریكا ب كارەكێ باش هاتە دیتن بۆ بهێز كرنا پەیوەندییا دناڤبەرا حكومەتا هەرێما كوردستانێ و ئەمریكا دا، هەروەسا رێككەفتنێن ل سەر كێلگەهێن گاز و نەفتێ د چارچووڤەیێ مافێن دەستووریێن هەرێما كوردستانێ دا بۆ بهێزكرنا ئابوورێ هەرێما كوردستانێ دا هاتە دیتن.
تەوەرێ چارێ/ دانوستاندن ل دوور پرۆسا پێكئینانا كابینا دەهێ یا حكومەتا هەرێما كوردستانێ كر.
تەوەری پێنجێ/ دانوستاندن ل دوور پرۆسا هەلبژارتنێن خۆلا شەشێ یێن جڤاتا نونەرێن عیراقێ هاتە كرن و پلان و بەرنامەیێن بهێت یێن سازیێن مە سەبارەت پرۆسا هەلبژارتنان هاتە خواندن.