ل درێژاهییا سالێ، كێم ڕۆژ یێن هەین كارەسات و تاوان و زۆلمەكا كو ژلایێ حكومەتێن عیراقێڤە د دەرحەقێ گەلێ كوردستانێدا هاتبیتە كرن، نەهێتە بیر ئینان.
42 سالان بەری نوكە د ڕۆژەكا وەكو ئەڤرۆدا، ڕژێما پێشتر یا عیراقێ هەشت هزار زەلامێن پیر و گەنجێن بارزانی د ژییێ نەهـ هەتا پیرەمێرێ 90 سالیدا، ب زۆری ڤەگۆهاستنە بیابانێن باشوورێ عیراقێ و ل وێرێ ب دڕندانە كۆمەلكوژ كرن.
ئەو تاوانە پشكەكە ژ وان تاوانان بوو، یێن ب سەر گەلێ كوردستانێدا هاتین، هەر ژ بێسەروشوینكرنا 12 هزار گەنجێن فەیلی، ئەنفالا گەرمیان و بادینان، كیمیا بارانكرنا هەلەبجە و دەڤەرێن دی یێن كوردستانێ بگرە، هەتا تەعریب و ڤەگۆهاستنا ب زۆری یا وەلاتییێن كورد.
ئەو عەقلیەتا ل پشت وان تاوانان و تاوانێن دی بوویە، عەقلیەتا شۆڤینی و نكۆلكاری بوو، كو بۆ هەموو عیراقێ ببوو ژێدەرێ نەهامەتی و پاشكەڤتنێ.
ب مخابنیڤە هێشتا هندەك كەس هەنە، هێشتا عیبرەت ژ مێژوویێ وەرنەگرتینە و هەر ب وێ عەقلیەتێ كار دكەن.
دڤێت هەموو لایەن بزانن هندی ئەو عەقلیەتە هەبیت، عیراق چ جاران ب خۆ ناحەسییێت.
ل یادا ئەنفالا بارزانییان، سوپاسییا جەماوەرێ دەشتا هەولێرێ و حەریر و سۆرانێ دكەم، كو دڤێ ڕۆژا دژواردا هەڤسۆزێن بارزانییان بوون و هاریكارییا وان كر.
من پێزانین بۆ خۆراگرییا كەسوكارێن ئەنفالان ب تایبەتی ئەوان دایك و ئافرەتێن بارزانی هەیە، كو سالێن دوور و درێژ ئازارێن ژ دەستدانا ئەزیزێن خۆ دبینن، دڤێ یادێدا هزاران سلاڤ بۆ گیانێ پاقژێ بارزانییێن ئەنفالكری و هەموو شەهیدێن ئەنفال و شەهیدێن ڕێیا ئازادییا كوردستانێ د هنێرم.
