پەیاما سەرۆك مهسعود بارزانی د سالڤهگهڕا 79 سالییا دامەزراندنا پارتی دیموكراتی كوردستان؛
ب ههلكهڤتا 79 سالییا دامەزراندنا پارتی دیموكراتی كوردستان گەرمترین پیرۆزباهییێ ئاراستەی ههموو كادر و ئەندام و جەماوەر و لایەنگرێن پارتی دكەم. پیرۆزباهییێ ل خێزانێن سهربلندێن شەهیدان و پێشمەرگەیێن قاهرهمان و هەموو پێكهاتەیێن كوردستانێ دكەم و هیڤییا سهربلندییێ بۆ دخوازم.
دامەزراندنا پارتی ل 16 تهباخا 1946ـێ پێدڤییهكا دیرۆكی بوو بۆ بەردەوامی و درێژەپێدانا خەباتا گەلێ كوردستانێ ل بەرامبەر پیلانێن نەیار و داگیركارێن كوردستانێ كو ب هەموو هێز و شیانان بزاڤێن شكاندنا ئیرادە و بێدەنگكرنا خەباتا گەلێ كوردستانێ دایه. پارتی هەر ژ دهستپێكا دامەزراندنێ هەتا نوكه ئامرازهك بوو بۆ بهرهڤانیكرن ژ ماف و پێناسە و بوونا گەلێ كوردستانێ و د ههمان دهمدا ئامراز بووە بۆ ب دهستڤهئینانا ئارمانجا دیموكراتی و نیشتیمانی و نەتەوەییێن گەلێ كوردستانێ.
ل سالڤهگهڕا 16 تهباخێ و دامەزراندنا پارتی دیموكراتی كوردستاندا دووپات دكهین پارتی د هەموو قۆناغاندا هەلگرێ پەیاما ئاشتی و برایەتی و پێكڤهژیانێ بوویه و ڕۆلێ خۆ یێ پیشهنگانه ل ویستگەهێن گرنگ و د دیرۆكا سیاسییا كوردستانێ و عیراقێدا ب باشی گێرایه.
هەروەسا پەیاما من بۆ جەماوەر و لایەنگر و ئەندامێن پارتی ئەوە، كو پارتی حزبا دۆز و ب بها یێن بلندێن گەلێ كوردستانێ یه، پارتی حزبا ڕێبازا بارزانی و جهێ ئومێدا خەلكێ كوردستانێ یه. پێدڤییه هەموو پارتی د ئاستێ مهزنێ دیرۆكا حزبێ و خوینا شەهیدان دابن و دڤێت ئەركێ خۆ ب باشترین شێوە ئەنجامبدەن كو خزمەتكرن و ئاڤهدانی و سەقامگیرییا كوردستانێ یه. داخواز ژ هەموو پارتییان دكەم ئیرادە و هیڤییا وان یا ب هێز بیت چونكە، پارتی ب هێز بیت كوردستان یا ب هێزە.
مسعود بارزانی
