پارتی دیموکراتی کوردستان سوپاسیا ھەمی ئەو لایەن و نوینەرێن وەلاتان دکەت کو ب هەلکەڤتا 79 سالیا سالڤەگەرا دامەزراندنا پارتی پەیامێن پیرۆزباھییێ ھەبوون.
پارتی د پەیامەکا سوپاسداریێ دا ب ناڤێ سەرۆک بارزانی و مەکتەبا سیاسیڤە سوپاسیا پەیامێن پیرۆزباھییێن ھەمیا دکەت و دبێژیت، “پەیام و پیرۆزباھییێن وە، جھێ رێز و پێزانینا مەنە و گیانێ کارکرنا پێکڤە زێدەتر دکەت”.
ھەروەسا دبێژیت، “پەیامێن وەیێن ھێژا، بۆ جەنابێ سەرۆک مەسعوود بارزانی و مەکتەبا سیاسی و ئورگانێن دی یێن پارتییا مە، ھەلگرێ گیانێ برایەتی و ھەڤخەباتیێنە، لەوما جهێ پێزانینێنە و سوپاسدارین”.
رۆژا 16-08-2025، سالڤەگەرا دامەزراندنا پارتی دیموکراتی کوردستان و ژدایکبوونا سەرۆک مەسعوود بارزانی بوو.
دەقێ پەیاما پارتی دیموکراتی کوردستان:
ب ناڤێ سەرۆک (مەسعوود بارزانی) و مەکتەبا سیاسی یا پارتی دیموکراتی کوردستان، سوپاس و پێزانینێن خوە ئاراستەی ھێژایان سەرۆک و سکرتێر و سەرکردایەتیا حزب و لایەنێن کوردستانی و عێراقی و سیاسەتمەدار و حزبێن تێکوشەر یێن ھەر چار پارچێن کوردستانێ، ھەروەسا سوپاسیا نوینەرێن وەلاتان ل ھەرێما کوردستانێ و عیراقێ و دامەزراوێن دەولەتێ و رێکخراوێن جڤاکا مەدەنی و ناڤەند و دامەزراوێن زانستی و ئەکادیمی و میدیایی و کەسایەتیێن ئایینی و جڤاکی و نوێنەرێن پێکھاتە و خەلکێ رێزدارێ کوردستانێ و سەرجەم ئەو کەس و لایەنان دکەین، کو د بیرەوەریا (16ێ تەباخێ) و حەفتێ و نەھەمین سالڤەگەرا دامەزراندنا پارتی دیموکراتی کوردستانێ و سالڤەگەرا ژدایکبوونا جەنابێ سەرۆک مەسعوود بارزانی، ب پەیام و بروسکە و پیرۆزباھینامەیێن خوە د ڤێ هەلکەڤتو شکودار دا بەشداربوون، پەیام و پیرۆزباھییێن وە، جھێ رێز و پێزانینا مەنە و گیانێ کارکرنا پێکڤە یا مە زێدەتر دکەت.
پەیامێن وەیێن ھێژا، بۆ جەنابێ سەرۆک مەسعوود بارزانی و مەکتەبا سیاسی و ئورگانێن دی یێن پارتیا مە، ھەلگرێ گیانێ برایەتی و ھەڤخەباتیێنە، لەوما جهێ پێزانینێنە و سوپاسدارین. جارەکا دی سوپاسیێن خوە رادگەھینین و ھەمی لایەک ھەر سەرکەڤتی بن..
مەکتەبا سیاسی
پارتیا دیموکراتا کوردستانێ
20ێ تەباخا 2025
