<h2>سەرۆك بارزانی پەیامەك ب هەلكەڤتا بووینا 64 سالان ل سەر شۆرەشا ئەیلوولێ بەلاڤكر. دەقێ پەیاما سەرۆك بارزانی: ب ناڤێ خۆدایێ مەزن و دلوڤان شۆرەشا ئەیلوولێ لاپەرەكێ زێرینێ بزاڤا ڕزگاریخوازا كوردستانێ بوو، مەزنترین شۆرەشا سەرانسەرییا سیاسی و چەكداری و جەماوەرییا كوردستانێ بوو، كو خەلك پالدا ب ڕێز و باوەری ب خۆبوونڤە بەرەڤ ئارمانجێن نوو و ئاسویەكێ بەرفرەهـ پێنگاڤان پاڤێژن، د ئەنجامدا دۆزا گەلێ كوردستانێ قووناغا مەزن دەربازكر، ئەڤێ شۆرەشێ ب ڕابەرییا بارزانییێ نەمر بۆ جارا ئێكێ د مێژوویێدا بنەمایەكێ موكۆم بۆ تێكۆشان و خەباتا هەڤپشك یا دەڤەرێن جۆدا یێن كوردستانێ و هەموو تەخ و چین و پێكهاتەیێن كوردستانێ دانا، ئەوژی ژ پێخەمەت بەرەڤانیكرن ژ دۆزا ڕەوا و مافێن خەلكێ كوردستانێ، شۆرەشا ئەیلوولێ بۆ قووناغێن دی یێن خەباتا گەلێ كوردستانێ ژی ژێدەرێ هێز و ئیلهامێ بوو، ئەزموون و دەستكەڤتێن ئەوێ شۆرەشا مەزن بۆ هەردەم بەرچاڤ ڕوونییێ د دەنە خەبات و تێكوشانا گەلێ كوردستانێ. ل هەلكەڤتا 64 سالییا سەرهلدانا شۆرەشا ئەیلوولێ، من دەستخۆشی و پێزانین بۆ هەموو ئەوان كادر و پێشمەرگە و خەباتگێران هەنە، یێن ب پێداگیری و وێرەكانە و وەستیانڤە مێژوو و شانازی بۆ گەلێ كوردستانێ تۆماركری، هەر دڤێ هەلكەڤتێدا هزاران سلاڤان بۆ شەهیدێن شۆرەشا ئەیلوولێ و هەموو شەهیدێن ڕێیا ئازادییا كوردستانێ د هنێرم. مەسعود بارزانی 11ی ئەیلوولا 2025ێ</h2>
