مەسرور بارزانی: دووپاتییێ ل پابەندبوون و بلند ڕاگرتنا بهایێن گرنگێن شۆرەشا ئەیلوولێ دكەین

سەرۆكوەزیرێن هەرێما كوردستانێ پەیامەك ب هەلكەڤتا دەربازبوونا 64 سالان ل سەر شۆرەشا ئەیلوولێ بەلاڤكر و تێدا دیاركر، ئەو دووپاتییێ ل پابەندبوون و بلند ڕاگرتنا بهایێن گرنگێن شۆرەشا ئەیلوولێ ژ ئێكگرتن و تەبایی و هەموو پێكهاتە و تەخ و چینێن گەلێ كوردستانێ ژ پێخەمەت داكۆكیكرن ل ماف و دەستكەڤتێن نیشتیمانی و پاراستنا قەوارەیێ دەستوورییێ هەرێما كوردستانێ دكەن.
مەسرور بارزانی سەرۆكوەزیرێن هەرێما كوردستانێ ئاشكراكر، ئەو ب ڕێزڤە شۆرەشا مەزنا ئەیلوولێ ب ڕێبەرییا ڕابەرێ نیشتیمانی جەنابێ بارزانییێ نەمر ل بیر دئینن، كو شۆرەشەكا سەرانسەرییا خەلكێ كوردستانێ بوو ب هەموو نەتەوە و ئایین و پێكهاتەیێن جۆداڤە، ژ پێخەمەت بەرەڤانیكرن ژ مافێن نەتەوەیی و نیشتیمانییێن گەلێ كوردستانێ و ڕاوەستییان دژی ستەم و داگیركارییێ.
هەروەسا ڕاگەهاند، ژبەر خۆراگری و ئیرادەیا ب هێزا خەلكێ كوردستانێ و ئێكگرتنا گەلێ كوردستانێ ل شۆرەشا ئەیلوولێ، چەندین دەستكەڤتێن گرنگ ب دەستڤە هاتن كو گرنگترینێ وان ڕێككەڤتنا 11 ئادارا سالا 1970ێ و نەچاركرنا ڕژێما عیراقێ بوو بۆ دانپێدانێ ب مافێن گەلێ كوردستانێ بوو.