<h2>سەرۆكێ هەرێما كوردستانێ پەیامەك ب هەلكەڤتا شۆرەشا ئەیلوولێ بەلاڤكر و دیاركر، شۆرەشا ئەیلوولێ ببوو هیڤینێ كۆمكرنا هەموو تەخ و چینان و گەهاندنا دەنگێ ڕەوایێ گەلێ كوردستانێ ب تماما جیهانێ، ئەڤرۆ ژی بۆ پاراستنا ماف و دستكەڤتان دڤێت هەموو پێكڤە كاربكەن هەتا گەل و وەلات دگەهنە كەنارێ ئارامییێ. نێچیرڤان بارزانی سەرۆكێ هەرێما كوردستانێ د پەیاما خۆدا دیاركر، شۆرەشا مەزنا ئەیلوولێ ل سەردەمەكێ ئالۆز و دژوار كو ژ هەموو لایانڤە ستەم ل گەلێ كوردستانێ دهاتە كرن، بوو ناسنامە و بنەمایێ هزرا نەتەوەیی و نیشتیمانی، گیانەكێ نوو بۆ ڕاوەستییان و ڕووبروبوونێ دا كوردستانییان. هەروەسا ئاشكراكر، ل هەلكەڤتا شۆرەشا ئەیلوولا مەزن، ڕابەرێ شۆرەشێ و گەلێ كوردستانێ بارزانییێ نەمر و تماما ئەوان سەركردە و پێشمەرگەیێن قارەمان و دلسوزێن كوردستانێ ل بیر د ئینن، كو پشكدار و هەڤپشك و هێز و بازێن شۆرەشێ بوون، سلاڤ بۆ گیانێ شەهیدان و سلاڤان بۆ بنەمال و كەسوكارێن وان یێن سەربلند دهنێرن. سەرۆكێ هەرێما كوردستانێ دیاركر، دڤێ هەلكەڤتێدا ئەو دووپاتییێ ل ئارمانج و پرەنسیپ و بهایێن بلند یێن شۆرەشێ ل ئازادی، دیمۆكراسی، پێكڤەیی، ئێكودوو قەبوولكرن، لێبوورین و ئاشتییێ دكەن، وەكو كا چەوا شۆرەشا ئەیلوولێ شۆرەشا هەموو پێكهاتەیێن كوردستانێ بوو، هەموویان پێكڤە ئێك ڕێزی و تەبایی بۆ ئێك ئارمانج خەبات دكر و قۆربانیدا، ئەڤرۆژی بۆ پاراستنا ماف و دەستكەڤتان دڤێت هەموو پێكڤە كار بكەن هەتا گەل و وەلات دگەهنە كەنارێ ئارامییێ.</h2>
