پەیڤ هه‌لویسته‌، و هه‌لویست قه‌ده‌ره‌، و قه‌ده‌ر ژی ئازادی یه

ئه‌حمه‌د زوبێر بانی

د رێكێن خه‌باتا درێژدا، با و باروڤە د هێن و زه‌لال د بن، لێ ئالایەک هه‌یه‌ ناكه‌ڤیت، حزبه‌ك هه‌یه‌ نالڤیت، و ئیراده‌یه‌ك هه‌یه‌ ناهێته‌ شكاندن… ئه‌ڤه‌ روحا پارتی یه‌.
ژ وێ گاڤێ پارتی ب ده‌ستێ بارزانیێ نه‌مر هاتیە دامه‌زراندن، چ جاران رێكخستنه‌كا سیاسی یا ب ته‌نێ نه‌بوو، به‌لكی خه‌ونا مللەتی بوو د گه‌رییا شه‌رفا خوه‌دا، و ده‌نگێ كوردان بوو یێن نه‌ڤیاین ببن په‌راوێز د وه‌لاتێ خوه‌دا.
پارتی درویشم نه‌بوو د وه‌رزێ هه‌لبژارتناندا بهێته‌ بلندكرن، به‌لكی بزاڤه‌كا ژیانێ بوو د رامانا باوەریێ دا، قوربانیدانێ، و وه‌فاداریێ بۆ كوردستانێ بجهـ د ئینا.
چه‌ند رۆژه‌ك به‌ری نوكه‌، د ئاهه‌نگا ده‌ستپێكا هه‌لمه‌تا هه‌لبژارتنێدا ل هه‌ولێرێ، سه‌رۆك مه‌سعود بارزانی گۆتنا خوه‌ یا كو دل هه‌ژاندین گۆت:
“پارتی ب هەوە ناشكێت.”
ئه‌و په‌یڤه‌ درویشمێ هه‌لبژارتنێ نه‌بوون، به‌لكی كورته‌یه‌ك بوو ژ رێكه‌كا ته‌مه‌نێ ده‌هان سالان ژ به‌رهه‌نگاری و سه‌قامگیریێ.
چونكی پارتی كو ژ رەحمێ نەخوشیان ژ دایك بوویه‌، و د چیایان دا مه‌زن بوویه‌، چ جاران با و باروڤە نەشێن کارتێکرنێ لێ بکەن .
ئه‌و حزبه‌ كو سه‌قامگیر ما چونكی ره‌هێن وێ د ئه‌ردیدانه‌، و باوەریا وێ د دلیدایه‌، و رێك ورێبازا وێ روحه‌ك رێڤه‌دبه‌ت كو شكه‌ستنێ ناناسیت.
و چاوا دێ شكێت حزبه‌ك كو سه‌رۆك مه‌سعود بارزانی ل پشت وێ یه‌، ئه‌وێ كو ئەم فێرکرین كو سه‌قامگێری نه‌ ترسه‌، به‌لكی باوەری یە ‌ ب حه‌قیێ، و پاشڤه‌چوون نه‌ بژارده‌یه‌ ده‌ما كوردستان د دلی دا بیت؟
ئه‌و به‌رده‌وامیا ئاسایی یه‌ بۆ قوتابخانه‌یه‌كا خه‌باتێ یا كو بارزانیێ نه‌مر دامه‌زراندی ، لێ په‌یڤ هه‌لویسته‌، و هه‌لویست قه‌ده‌ره‌، و قه‌ده‌ر ژی ئازادی یه‌.
پارتی نه‌ بتنێ حزبه‌، به‌لكی بیردانکا كوردستانێ یه‌، و ویژدانا هەر كورده‌كێ وێ یێ ئازادە .
ئه‌و به‌رده‌وامیا دیرۆكه‌كێ یه‌ كو ب خوینا شه‌هیدان هاتیه‌ نڤیساندن، و ب خوها خه‌باتكه‌ران یێن كو باوه‌ری ب وێ كر كو په‌یڤا راستگۆ بهێزتره‌ ژ تۆپان، و عه‌داله‌ت ناهێته‌ شكاندن چه‌ند‌ شه‌ڤا زولمێ درێژ بیت.
بلا هه‌موو بزانن… كو پارتی دێ مینیت هه‌تا كوردستان بمینیت،
ئالایه‌ك بلند، و ده‌نگه‌ك راستگۆ، و ره‌مزه‌ك بۆ ئیراده‌یه‌كا چ جاران نەهێتە شکاندن .