وەزارەتا خواندنا بلند و ڤەکۆلینێن زانستی ل هەرێما کوردستانێ دیار كر: ئەڤرۆ ئێکشەمبی ب چاڤدێرییا وەزیرێ خواندنا بلند، دیدارەکا تایبەت ب ناڤێ “دیدارا کەزی” بۆ خانمێن ئەکادیمی ل ئاستێ زانکۆ و ناڤەندێن زانستی یێن هەرێمێ دێ ئەنجامدەت” ب مەرەما ب هێزکرنا رۆلێ خانمان ل ناڤەندێن بڕیاردانێ و دارێژتنا سیاسەتا گشتییا زانکۆیان دا.
عەباس ئەکرەم، پەیڤدارێ وەزارەتا خواندنا بلند و ڤەکۆلینێن زانستی ل هەرێما کوردستانێ دیار کر: ئەڤ دیدارە یا تایبەتە ب وان خانمێن ئەکادیمی یێن کو ل سەرۆکاتیا زانکۆیان، کۆلیژان و پشکێن جودا یێن زانکۆ و پەیمانگەهان دا خودان بەرپرسیارەتینە، یان وەک مامۆستا و ڤەکۆلەر کاردکەن، دێ گەنگەشێ ل سەر پێگەهێ زانستی و کارگێرییێ ژنان د ناڤ سازییێن خواندنا بلند دا كەن.
پەیڤدارێ وەزارەتا خواندنا بلند رۆناهی ئێخستە سەر تەوەرێن سەرەکی یێن دیدارێ و گۆت، د ڤێ کۆمبوونێ دا دێ گەنگەشە ل سەر سێ تەوەرێن بنەرەتی هێتە کرن، ئەو ژی رۆلێ خانمان د سەرکردایەتیکرنا دامەزراوەیێن خواندنا بلند دا، رۆلێ خانمان د پرۆسەیا ئاڤاکرنا شیان (کارامەیی) و داهێنانێ دا، رۆلێ وان د وارێ ڤەکۆلینێن زانستی و گەشەپێدانێ دا.
هەروەسا عەباس ئەکرەمی ئاماژە ب وێ چەندێ کر” کو ئەڤ دیدارە ب تنێ بۆ گەنگەشەیێ نینە، بەلکو ل دووماهییێ هەموو پێشنیار و راسپاردە دێ هێنە بەرهەڤکرن دا کو ببنە بنەمایەک بۆ چاکسازییا سیاسەتا گشتییا وەزارەتێ، ب ئارمانجا بهێزکرنا پێگەهێ خانمان و زێدەکرنا کارتێکرنا وان د ناڤەندێن زانستی و کارگێڕی یێن خواندنا بلند دا.”
