بۆ جارا ئێكێ ژنەك دبیتە سەرۆکا دادگەها هێزێن ئاسایشا ناڤخۆ

ئەڤرۆ سێشەمبی، 24ـی شواتا 2026، وەزارەتا ناڤخۆ یا حکومەتا هەرێما کوردستانێ، د گاڤەکا نوو دا بۆ پشتەڤانیکرنا پێگەهێ ژنان د بیاڤێن سەربازی و ئەمنی دا، پۆستێ سەرۆکێ دادگەها هێزێن ئاسایشا ناڤخۆ/ دو، دایە ب ئەفسەرەکا ژن.
ڕێبەر ئەحمەد، وەزیرێ ناڤخۆ یێ حکومەتا هەرێما کوردستانێ، ئەڤرۆ پێشوازی ل عەمیدا مافپەروەر چرا ئەحمەد لەتیف کر؛ د وێ دیدارێ دا عەمید چرا ب فەرمی وەک سەرۆکا دادگەها هێزێن ئاسایشا ناڤخۆ/ دو ب وەکالەت دەستبکار بوو.
وەزیرێ ناڤخۆ پیرۆزباهییێن گەرم ل عەمید چرا کرن و هیڤییا سەرکەفتنێ د برێڤەبرنا ڤی ئەرکێ هەستیار دا بۆ خواست.