مەسرور بارزانی: هەموو بزاڤان دێ کەین داكو هەرێمێ ژ شەر و ئالوزییێن دەڤەرێ دووربێخین

ئەڤرۆ سێشەمبی، 3ی ئادارا 2026، مەسرور بارزانی سەرۆکێ حکومەتا هەرێما کوردستانێ، ل هەولێرێ نەخۆشخانا “ماجدی یا تایبەت” کو ئێکە ژ پڕۆژەیێن ساخلەمییێ یێن هەرە پێشکەفتی ل سەر ئاستێ نێڤدەولەتی، ب فەرمی ڤەکر.
سەرۆکێ حکومەتێ پیرۆزباهی ل خەلکێ هەرێمێ و باژێرێ هەولێرێ کر بۆ ڤەکرنا ڤێ نەخۆشخانێ و دەستخۆشی ل وەبەرهێنەر (حاجی ئەحمەد) کر، هەروەسا پشتەڤانییا خۆ بۆ نۆشدار و کارمەندێن ساخلەمییێ دیار کر.
مەسرور بارزانی دیار كر: حکومەت دێ هەموو بزاڤان كەت داکو کوردستانێ ژ شەڕ و ئالۆزییێن رۆژهەلاتا ناڤین دووربێخیت و دەستکەفتێن گەلێ کورد بپارێزیت.
سەرۆکێ حکومەتێ دلگرانییا خۆ دیار کر بەرامبەر هێرشێن تیرۆرستی یێن ل ڤان رۆژێن دووماهییێ هاتینە سەر باژێرێ هەولێرێ ژ لایێ “گرووپێن ژ یاسایێ دەرکەفتی”.
سەرۆكێ حكومەتا هەرێمێ” داخواز ژ حکومەتا عێراقێ کر کو رێگرییێ ل ڤان گرووپان بکەت و نەهێلیت ئاخا هەرێمێ و وەلاتی ببنە ئارمانجا هێرشێن وان.