پەیامەك ژ سەرۆك بارزانی بۆ ڕایا گشتی

سەرۆك مەسعود بارزانی پەیامەك ل دۆر هێرشێن ل سەر هەرێما كوردستانێ دهێنەكرن، بۆ ڕایا گشتی بەلاڤكر.
دەقێ پەیاما سەرۆك بارزانی:
ب ناڤێ خۆدایێ مەزن و دلوڤان
ب درێژاهییا مێژوویێ گەلێ كوردستانێ چ دەمان دگەل شەڕی نەبوویە و هەردەم خوازیارێ ئاشتی و پێكڤەژیانێ بوویە، ئەگەر شەڕ ژی ب سەردا هاتبیت، بەرەڤانی ژ خۆ و مافێن خۆ كریە، ئەڤە بنەمایەكێ نەگۆرە و ژ باوەرییەكا موكۆم و فەرهەنگا دەولەتا ئاشتیخواز و پێكڤەژیانا گەلێ كوردستانێ ژێدەری وەردگریت.
مخابنییەكا مەزنە نوكە شەڕ و ئالۆزییێن مەزن ل دەڤەرا مە هەنە، نوكە و پێشتر هەردەم هیڤییا مە ئەوبوو كو هەموو ئاستەنگ و ئاریشە ب ڕێیا ئاشتییێ بهێنە چارەسەركرن، ژبەركو هەردەم شەڕ جهێ وێرانكرن و مالخرابكرنێ بوویە.
دڤی چارچووڤیدا جهێ حێبەتییەكا مەزنە هندەك گرۆپ و لایەن ل ژێر ناڤێ موقاومە و ب بهانە و دروشمێن بێ بنەما، ڕێ د دەنە خۆ هێرشی جهێن سڤیل و ژێرخانەیا ئابوورییا هەرێما كوردستانێ و بنگەهـ و بارەگایێن پێشمەرگەی بكەن، ئەڤە شەڕ فرۆتن و دەستدرێژییەكا ئاشكرایە بۆ سەر مافێن وەلاتییان و سەقامگێری و ئاسایشا هەرێما كوردستانێ.
ل ڤێرێ دڤێت هەموو لایەن باش بزانن كو ل بێهنفرەهییێ ژی سنوور هەیە، پێشمەرگەی چ جاران زۆلم و زۆرداری ژ چ كەسان قەبوول نەكرییە، نابیت ئەڤ شەڕ فرۆتنە و تێكدانا سەقامگێرییا هەرێما كوردستانێ و ئاساشیا وەلاتییان ژلایێ ئەوان گرۆپانڤە یا بەردەوامبیت، بۆ ڤێ مەرەمێ داخوازێ ژ حكومەتێ و پەرلەمانێ عیراقێ و لایەنێن سیاسی ب تایبەتێ چارچووڤێ هەماهەنگییێ دكەین، ب جددی بهێنە سەر هێل و سنوورەكی بۆ ئەڤان دەستدرێژییان بدانن، ژبەركو بەردەوامبوونا شەڕفرۆتنێ دێ دەرئەنجامێن خراب هەبن.
زێدەباری دەربڕینا هەڤخەمییێ بۆ خێزان و كەسوكارێن ئەوان ئەزیزێن ژ ئەنجامێ هێرشان شەهیدبووین، خەلكێ خۆشتڤییێ كوردستانێ پشتراست دكەین كو دێ ب هەموو هێزا خۆ د بەردەوامبین بۆ هندێ كوردستان ژ شەڕ و دەردەسەرییان دووربیت، ئارامی و ئاسایش و ژیانا خەلكی یا پاراستی بیت و سەركەڤتن بۆ هەر گەلێ كوردستانێ بیت.
مەسعود بارزانی
8ی ئادارا 2026ێ