پیت هێگسێت، وەزیرێ شەری یێ ئەمریکا، هەلویستێ وەلاتێ خۆ دەربارەیی ئالۆزیێن ل گەل ئیرانێ راگەهاند و دیار كر: هێرشێن وان یێن سەربازی بۆ سەر تەهرانێ دێ بەردەوام بن” هەتاكو هەموو شیانێن وی وەلاتی ژ کار دکەڤن.
هێگسێت د چاڤپێکەفتنەکا تەلەفزیۆنی دا ل گەل کەنالێ (CBS) ئاشکرا کر، نوکە ئۆپەراسیۆنەکا بەرفرەھ ب ناڤێ “داستانا تورەییێ” (Epic Fury) هەیە و پتر ژ 50 هزار سەربازێن ئەمریکی تێدا پشکدارن.
هەروەسا ئاماژە ب وێ چەندێ ژی کر، هەتا نوكە هێزێن ئەمریکا نێزیکی سێ هزار هێرشێن ئەسمانی د ناڤا ئاخا ئیرانێ دا ئەنجام داینە.
وەزیرێ شەری یێ ئەمریکا گۆت ژی: ئەم دێ د شەری دا بەردەوام بین هەتا کو ئەو بێ شیان دبن، وی دەمی چ بژاردە ل بەر دەستێ وان نامینن ب تنێ دێ خۆ رادەست كەن، هەروەسا دیار کر، ئەڤ شەڕە هێشتا د قووناغێن دەستپێکێ دایە.
