<h2>سەرهلدانا جەماوەری یا بهارا 1991ـێ، ب تنێ سهرهلدانهكا سادە نەبوو دژی ستەمکارییێ، بەلکو وەرچەرخانەکا ستراتیژی بوو د دیرۆکا دیپلۆماسییا کورد دا، کو تێدا دۆزا کورد ژ چارچووڤەیێ ئاریشهیهكا ناڤخۆییا عیراقێ دەرباز بوو و بۆ مژارەکا سەرەکی د ئەجیندایا نیڤدهولهتیدا. ئەڤێ سهرهلدانێ ب هەموو رەهەندێن خۆ ڤە، ب تایبەت پشتی کارەساتا کۆچا ملیۆنی، ویژدانا جیهانێ هەژاند و نەچار کر کو بۆ جارا ئێکێ ب چاڤەکێ سیاسی و یاسایی سەیری مافێن گەلێ کورد بکەن. ئەڤە ژی ل نیسانا 1991ـێ د دەرچوونا بڕیارا مێژوویی یا ژمارە 688 ژلایێ جڤاتا ئاسایشا نێڤدەولەتی (UN Security Council) ، کو ب ئێکەم بەلگەیێ شەرعیێ نێڤدەولەتی دهێتە هەژمارتن کو تێدا دانپێدان ب مافێن سیاسی و مرۆڤی یێن کوردان هاتیە کرن وەك گەف بۆ سەر ئاشتی و تەناهیا جیهانێ. ژ لایەکێ دی ڤە، سەرهلدانێ زەمینە خۆشکر بۆ دروستبوونا "ناڤچەیا ئارام" (Safe Haven) و سەپاندنا دژە-فڕینێ، کو ئەڤە ژی بوو بنەغەیێ دارشتنا قەوارەیەکێ سیاسی یێ دی فاکتۆ <strong>(</strong><strong>De Facto</strong><strong>)</strong> ل باشوورێ کوردستانێ. ئەڤ قۆناغە وەك دەستپێکا ناساندنا ناسنامەیا نەتەوەیی یا کوردان ل محفەلێن نێڤدهولهتیدا دهێتە دیارکرن، چونکی پشتی وێ دیرۆكێ، پەیوەندیێن هەرێما کوردستانێ ل گەل وهلاتێن زلهێز وەك ئەمریکا و بریتانیا و فرەنسا ژ قۆناغا "پەیوەندیێن مرۆڤی" بەرەف "هەڤپەیمانییا ستراتیژی" گەشە کر. ب ڤی ئاوای، سەرهلدانا 1991ـێ دیوارێ بێدەنگیێ رووخاند و دۆزا کورد وەك ئەکتەرەکێ کاریگەر د هاوکێشەیێن ڕۆژهەلاتا ناڤین دا جێگیر کر، کو ئەڤرۆ هەموو دەستکەڤتێن سیاسی و دبلۆماسی یێن هەرێمێ بەرهەمێ وێ ئیرادا پۆلایین و وێ وەرچەرخانا نێڤدهولهتی نە.</h2> <h2>"سەرهلدانا 1991ـێ ب تنێ سهرهلدانهك دژی ستەمێ نەبوو، بەلکو شۆرەشەکا دیپلۆماسی بوو کو دیوارێن بێدەنگییێ رووخاندن. کۆچا ملیۆنی یا کوردان بەرەف سنۆران، کارتەکا فشارێ بوو کو جیهان نەچار کر بڕیارا 688 دەربکەت، کو ئەڤە ژی بوو بنەغەیێ وێ پاراستنا نێڤدهولهتی یا کو ئەڤرۆ مە قەوارەیێ هەرێمێ پێ هاتیە پاراستن."</h2> <h2>نڤێسین؛<strong>ڕهبیع زێباری</strong></h2> <h2><strong>مامۆستایێ زانكۆیێ</strong></h2>
