نێچیرڤان بارزانی، سەرۆکێ هەرێما کوردستانێ پیرۆزباهیا جەژنا نەورۆزێ ل هاوەلاتیان دکەت و دبێژیت: “ئەرکێ مە هەمیانە ب بەرپرسیاریەتیا دیرۆکی کار بکەین بۆ دویرئێخستنا هەرێما کوردستانێ و عێراقێ ژ ئالۆزیان”.
سەرۆکێ هەرێما کوردستانێ ئەڤڕۆ ئەینی، 20ێ ئادارا 2026ێ ب هەلکەفتا هاتنا جەژنا نەورۆزێ پەیامەکا پیرۆزباهیێ بەلاڤکر، سەرۆکێ هەرێمێ ژ “ناخێ دلێ خۆ” پیرۆزباهیەکا “گەرم” ل هاوەلاتیان دکەت و دبێژیت: “هیڤیدارم ئەڤ جەژنە ببیتە ئەگەرێ ئارامی، ئاسوودەیی و کامەرانیێ بۆ هەمووان”.
دەقێ پەیامێ:
گەلێ کورد و کوردستانیێن خۆشتڤی ل هەر جهەكێ جیهانێ بن،
ب گەرمی و ژ ناخێ دل، جەژنا نەورۆزا نەتەوەیی و سەری سالا نووی یا کوردی ل هەوە و ل مالباتێن سەربەرزێن شەهیدان، پێشمەرگەیێن قارەمان و تمامیا هێزێن ئەمنی پیرۆز دکەم، هیڤیدارم ئەڤ جەژنە ببیتە ئەگەرێ ئارامی، ئاسوودەیی و کامەرانیێ بۆ هەمیان.
نەورۆز دەربڕینەکا کویرە ژ دیرۆکەکا تژی ژ تێکۆشان و داستانێن خۆڕاگریا نەتەوەیەکێ کو هەمی دەمان ب ئیرادەکا ب هێز بەرهنگاری ستەمێ بوویە و چو جاران خۆ ڕادەست نەکریە، نەورۆز نیشانا شکاندنا تاریاتیێ و نووژەنبوونا ژیانێ یە، ئەو ڕاستیا دیرۆکێ یە کو د سەلمینیت چو هێز و چەک نەشێن گڕا ئازادیخوازیێ د ناخێ کوردان دا ڤەمرینن.
ئەڤسالە د دەمەکێ دا پێشوازیێ ل بهار و نەورۆزێ دکەین، دەڤەرا مە د ڕەوشەكا هەستیار و ئالۆز دا دەرباز دبیت. مەترسیێن شەڕی و لێکەفتێن وی ل هەمی لایان دیار دبن، لەوما ئەرکێ مە هەمیانە ب بەرپرسیاریەتیا دیرۆکی کار بکەین دا کو هەرێما کوردستانێ و عێراقێ ژ ڤان ئالۆزیان دویر بگرین، ئاشتی و ئاشتیخوازی.
هاوەلاتیێن خۆشتڤی یێن کوردستانێ،
داخوازێ ژ هەوە دکەم د دەمێ گەشت و سەیرانان دا، ب تەمامی چاڤێدرییا سلامەتیا خۆ و مالبات و ئازیزێن خۆ بکەن. ب تایبەتی د ڤان ڕۆژان دا کو دەڤەرا مە د ڕەوشەكا ئالۆز و تژیە ژ لێکەفتێن مەترسیێن شەڕی دا دەرباز دبیت، پێدڤیە هەمی پتر ئاگەهداری خۆ بن.
پابەندی ڕێنمایێن هاتنوچوونا لایەنێن پەیوەندیدار بن، دا کو ئەڤێ جەژنێ ب ئارامی و سلامەتی ببۆرینن و چ ناخۆشی نەورۆزێ ل مە تەحل نەکەت. پاراستنا ژینگەهێ و سروشتێ جوانێ کوردستانێ، ئەرکەکێ نیشتیمانی و نیشانا شارستانیبوونا مە یە و دێ پابەند بین.
نەورۆز ل هەمی وان گەلان ژی پیرۆز بیت یێن کو ڤێ یادێ دکەن. خودایێ مەزن هەوە هەمیان و گەل و نیشتیمانێ مە بپارێزیت.
