جەژنا نەورۆزێ و سەری سالا نوو یا کوردی، ب گەرمی و ژ دل ل هەموو گەلێ کورد و ل هەوە یێن عەزیز پیرۆز دکەم کو ئەڤڕۆ ل ڤێرێ ل ئامەدا هێژا بۆ پیرۆزکرنا نەورۆزێ کۆمبووینە.
نەورۆز بۆ مە جەژنەکا تایبەتە؛ سیمبولا زیندووبوونێ و ئیرادا ژیانێیە، هەروەسا بەرجەستەکرنا هیڤیێن گەلەکێیە کو هەردەم تێهنییێ ئازادی و پێکڤەژیانێ بوویە، هیڤیدارم ئەڤ جەژنە ببیتە ئەگەرێ خێر و ئارامییێ بۆ هەموویان.
ئەڤ کۆمبوونا هەوە کو بوویە نەریتەکێ سالانە یێ جوان ل ئامەدێ، بخۆ جەژنا ژیان و جوانیێیە و دەربڕینێ ژ پەرۆشی و پەیاما کوردان دکەت بۆ برایەتی و قەبوولکرنا ئێکودو.
ئەم د دەمەکێدا ئەڤڕۆ جەژنا نەورۆزێ پیرۆز دکەین، دخوازین پشتگیریا دلسۆزانەیا خۆ بۆ ئاشتییێ دوپات بکەین، بجهئینانا ئاشتییێ ل تورکیا کارەکێ دیرۆكییە و د بەرژەوەندیا هەردو گەلێن کورد و تورک و هەموو دەڤەرێدایە، ئاشتی تاکە رێکە کو پاشەرۆژەکا گەش بۆ نەڤییێن مە مسۆگەر دکەت.
ئەم ژ مێژە جیرانین و هەڤچارەنڤێسین، چارەنڤیس و بەرژەوەندیێن مە ئێکن، ب تنێ ب ڕێکا پێکڤەیی و سەقامگیریێ دشێین ب سەر تەحەددییان دا زال ببین و پشکدارییێ د ئاڤاکرنا ژیانەکا شایستەدا بکەین.
ل ڤێرێ سوپاسی و دەستخۆشییێ بۆ هەموو ئەوان گاڤان دوپات دکەم کو هەتا نوکە بۆ سەرخستنا ئاشتییێ هاتینە هاڤێتن، ب هیڤی ڤە بەرێ خۆ ددەینە بزاڤان و چاڤێ مە ل گاڤێن زێدەترە.
ئەم ل هەرێما کوردستانێ، هەموو هاریکارییا خۆ بۆ سەرخستنا ئاشتییێ دوپات دکەین و چاڤەرێی ب دووماهی هاتنا ململانێ و چەسپاندنا سەقامگیریێ نە، وەرن پێکڤە کاربکەین داکو د ڤان رۆژاندا کو دەڤەر د ناڤ شەڕ و ململانێیێن دژوار دا دەرباز دبیت، ئاشتی ببیتە راستیەکا هەردەم.
