ب هەلکەفتا دەربازبوونا 128 سالان ل سەر دەرچوونا ئێکەم ژمارەیا ڕۆژنامەیا (کوردستان) و ساڵڤەگەڕا رۆژنامەگەرییا کوردی، د. دیندار زێباری، ڕێکخەرێ ڕاسپاردەیێن نێڤدەولەتی ل حکومەتا هەرێما کوردستانێ ڕاگەهاند: د دەمەکیدا ئەو ڤێ یادا مێژوویی ساخ دکەنەڤە، دووپاتییێ ل سەر هندێ دکەن کو ئەو یاسایێن ل هەرێما کوردستانێ بۆ ڕێکخستنا بیاڤێ ئازادییا ڕادەربڕینێ و کارێ میدیایی دهێنە پەیڕەوکرن، یاسایێن پێشکەفتی و بەرکارن ل سەر ئاستێ دەڤەرێ و هەڤتەریبن دگەل بنەمایێن نێڤدەولەتی.
سەبارەت ب بزاڤێن حکومەتێ بۆ شەفافیەت و دەستکەفتنا پێزانینان، ڕێکخەرێ ڕاسپاردەیێن نێڤدەولەتی ئاماژە ب وێ چەندێ کر: یاسایا مافێ بدەستڤەئینانا پێزانینان یا ژمارە 11 یا ساڵا 2013ێ، ئێکە ژ یاسایێن هەرە گرنگ، هەرچەندە ڕێنماییێن گشتی یێن وێ هێشتا دەرنەکەفتینە، لێ ڕێکارێن تایبەت بۆ بجهئینانا وێ یاسایێ هاتینە دەرئێخستن ب گۆری پلانا حکومەتا هەرێمێ بۆ مافێن مرۆڤی و نوکە د بیاڤێ بجهئینانا کردەیی دانە، ئەڤە ژی پێنگاڤەکا گرنگە بۆ ب ساناهی کرنا کارێ ڕۆژنامەڤان و ڤەکۆلەران.
د پشکەکا دی یا داخۆیانییا خۆ دا، ڕێکخەرێ ڕاسپاردەیێن نێڤدەولەتی تیشك خستە سەر چەند یاسایێن دی یێن بەرکار و گۆت: یاسایا ڕێکخستنا خۆپیشاندانان یا ژمارە 11 یا ساڵا 2010ێ، ل سەر ئاستێ دەسهەڵاتا جێبەجێکرنێ بەردەوام کار پێ دهێتە کرن، هەروەسا یاسایا کارێ رۆژنامەڤانی یا ژمارە 35 یا سالا 2007ێ، یاسایەکا کارایە و دادوەر ل سەر ئاستێ هەرێما کوردستانێ د ئێکلاکرنا کەیساندا پشتبەستنێ ل سەر دکەن، ئەڤە ژی سەلمێنەرا هندێ یە کو سیستەمێ دادوەری و جێبەجێکرنێ پابەندی پاراستنا مافێ رۆژنامەڤانانە.
د. دیندار زێباری دووپاتی ژی ل سەر هندێ کر کو یاسایا چاپەمەنییێ ژی وەكو پشکەك ژ سیستەمێ ئازادییا ڕادەربڕینێ بەرکارە، لێ ئاماژە ب پێدڤییا پێنگاڤێن داهاتی کر و گۆت: بۆ هندێ کو زێدەتر دگەل گوهۆڕینێن سەردەم و پێشکەفتنا تەکنەلۆژیایێ بگونجن، ئێك ژ کارێن وان یێن ل پێش د پاشەرۆژێ دا هەموارکرنا یاسایا رۆژنامەگەرییا سالا 2007ێ یە، ب جۆرەکێ کو دگەل ژینگەها میدیا یا دیجیتاڵی و وان ئاستەنگێن نوو یێن هاتینە پێش بگونجیت، داکو بشێن باشترین مودێلێ ئازادییا میدیایی ل دەڤەرێ پێشکێش بکەن.
د. دیندار زێباری پیرۆزباهییا ڤێ یادێ ل هەموو رۆژنامەڤان و میدیاکارێن هەرێما کوردستانێ کر و دووپات کر، حکومەت دێ بەردەوام بیت ل سەر پشتەڤانیكرنا ئازادییا کارێ میدیایی وەکو کۆلەکەکا سەرەکی یا دیموکراسییێ.
