<h2>نێچیرڤان بارزانی، سهرۆكێ ههرێما كوردستانێ ب ههلكهفتا دامەزراندنا ئێکەتییا نیشتمانییا کوردستانێ پهیامهك بۆ بافل جەلال تالەبانی، سەرۆکێ ئێکەتییا نیشتمانییا کوردستانێ بهلاڤكر.</h2> <h2> دهقێ پهیامێ: سلاڤ و ڕێز.. د سالڤەگەڕا دامەزراندنا ئێکەتییا نیشتمانییا کوردستانێدا، ب گەرمی پیرۆزباهییێ ل هەوە، سەرکردایەتی، ئەندام و ههموو جەماوەرێ ئێکەتییا نیشتمانییا کوردستانێ دکەم و هیڤییا سەرکەڤتنێ بۆ هەوە دخوازم، د ڤێ ڕۆژێدا، پێگەهێ دیرۆكی، خەبات و تێکۆشانا خودێ ژێ ڕازی سەرۆك مام جەلال بلند د ههلسهنگینین و ب ڕێزڤە ل بیردئینین.</h2> <h2> ئێکەتییێ دیرۆكهكا درێژ یا خەباتێ ژ پێخهمهت مافێن گەلێ کوردستانێ هەیە و د ڤێ ڕێکێدا ب هزاران شەهید داینە، هەر دەم خودان پێگەهەکێ گرنگ و کاریگەر بوویە د پرۆسەیا سیاسییا هەرێما کوردستانێ و عیراقێدا، د ڤێ ڕۆژێدا دووپات دکەین ژ هەر دەمەکی زێدەتر بەرپرسیارەتییا هەڤپشك، تەڤاهی و کارێ پێکڤەیی د ناڤبەرا هەموو هێز و لایەنێن سیاسیدا پێدڤییە، داکو پێکڤە بشێین پاراستنێ ل قەوارەیێ دەستوورییێ هەرێما کوردستانێ و مافێن گەلێ کوردستانێ بکەین.</h2> <h2> هیڤیخوازم ئەڤ ڕۆژه ببیتە دەلیڤەکا نوو بۆ ب هێزکرنا ئێکڕیزییا نیشتمانی و زالکرنا زمانێ دیالۆگ و لێکتێگەهشتنێ ژ پێخهمهت چارەسەرکرنا ئاریشەیان، سەقامگیری، گەشەپێدان و پاشەڕۆژەکا باشتر و ژ هەژی بۆ گەلێ کوردستانێ.</h2> <h2> نێچیرڤان بارزانی سهرۆكێ ههرێما كوردستانێ</h2>
