ناڤەرۆكا كۆمبوونا جڤاتا وەزیران

وەزیرێ سامانێن سروشتی و شاندێ دانوستاندکار هاتنە ڕاسپاردن، داکو هەر زوو ب ڕێیا بۆریا نەفتا هەرێمێ، بلندترین ئاستێ هنارتنا نەفتێ بۆ بازارێن جیهانی بهێتە كرن.
ئەڤڕۆ چارشەمبی، جڤاتا وەزیرێن هەرێما کوردستانێ ب سەرپەرشتیا مەسرور بارزانی (سەرۆکێ وەزیران) و ئامادەبوونا قوباد تاڵەبانی (جێگرێ سەرۆک وەزیران) کۆمبوو ل دۆر چەند بابەتەکێن گرنگ یێن گرێدایی پەیوەندیێن هەولێر و بەغدا، دۆسیەیا نەفتێ و داهاتێ وی گوتۆبێژ كرن.
سەرۆکێ وەزیران ئاماژە ب سەرەدانا خۆ یا دووماهییێ بۆ بەغدا کر و جەخت ل سەر گرنگیا دارشتنا نەخشەڕێیەکێ کر بۆ بەردەوامیدان ب دانوستاندان، بۆ ڤێ مەرەمێ، سەرۆك وەزیران پێشنیارا دامەزراندنا “دەستەیەکا بلند یا وەزاری یا هەماهەنگیا بەردەوام” کر، کو ژ وەزیر و بەرپرسێن پەیوەندیدارێن هەردو حکومەتێن هەرێمێ و عێراقێ پێکبهێت.
هەروەسا وەزیرێ سامانێن سروشتی و شاندێ دانوستاندکار هاتینە ڕاسپاردن کو ب زووترین دەم و ب بەرزترین ئاست هنارتنا نەفتا هەرێمێ بۆ بازارێن جیهانی ب ڕێیا بۆریا هەرێمێ دەستپێبکەنەڤە.