ل ڕۆژا 17/7/1988ێ حکومهتا ئیرانێ بڕیارا (U.N ) یا ڕاوهستاندنا شهڕێ ههشت ساڵییێ ئیران-عیراقێ پهژراند و شهڕ دناڤبهرا ههردوو وهڵاتان دا ڕاوهستا.
ههر ئێکسهر دوو ڕۆژان پشتی هینگێ و ل ڕۆژا 19/7/1988ێ حکومهتا عیراقێ ب هێزهکا مهزنا لهشکهری هێرش کره سهر بارهگایێن پێشمهرگهیی و گوندێن دهڤهرا ڕزگارکری ل سێکوچا سنوورێن باکوور- باشوور و ڕۆژههلات (تورکی – عیراق و ئیران)، کو ب دهڤهرا خواکوڕکی د هێته ناسین.
حکومهتا عیراقێ ئهڤ شهڕێ خوه ب ناڤێ (توکلت علی الله) ب ناڤکر.
هێزێن لهشکهرییێن هێرشکهرێن حکومهتا عیراقێ ب ڤی شێوێ خوارێ بوون:
1- فرقا 33 یا سهر ب فهیلهقا 5
2- فرقا 45 یا سهر ب فهیلهقا 1
3- فرقا 18
4- فرقا 35
5- لیوایا 16 یا هێزا تایبهت
6- لیوایا 68
7- لیوایا 702 یا پیادە
8- فهوجا 1 مغاویر ژ فرقا 33
9- لیوایا 402 پهیاده
10- لیوایا 120 مغاویر
11- لیوایا 2 ژ هێزێن ناڤخوه
12- فهوجا 3 ژ لیوا 2 مغاویر
13- فهوجا 1 مغاویر سهر ب فرقا 3
14- ب دههان فهوجێن جاشان
15- 5 کهتیبهیێن تۆپێن مهیدانی (گران) و ژمارهیهکا تۆپێن هاوهن
16- 3 کهتیبهیێن تانكا (دهبابه)
17- ژمارهیهکا زێدە یا فڕۆکهیێن جهنگی، ههلیکۆپتهر و پیلاتۆز
هێزێن شوڕەشێ پێکهاتبوون ژ:
1- هێزا ئاواره ( ڕێکخراوێن: 16 ئاب، 11 ئهیلول، 26 گولان و ڕێباز)
2- هێزا بارزان ( ڕێکخراوێن: قهلهندهر، پیران، شیرین، زۆزک و برووسک)
3- هێزا حهمرین ( ڕێکخراوێن: ( سهفین، ئهزمڕ و سهگرمه)
4- هێزا خهبات ( ڕێکخراوێن: موسهکا و چارچهل)
5- هێزا سهرکردایهتیێ ( ڕێکخراوێن: کارۆخ، سورداش، گۆڤهند، گۆڕهز و ئاراس)
6- تۆپخانا شوڕشێ، کو بهرپرسێ وێ عهلی سهلیم باجلوری دڤی شهڕی دا شههید بوو.
7- هێزا بابهگوڕگوڕ سهر ب لقا سێ یا پارتی ڤه.
8- هێزا زمناکۆ لقا چار
9- هێزا بهرگرییا مللی
10- هیزێن لقێن 2،3 و 4
11- مهفرهزهیهکا پارتییا کۆمونیستا عیراقێ
12- لژنا ئازادی ل زێوه بهرپرس بوو ژ کارێن ئیداری و لوجستی یێن بهرهیێ شهڕی، کو عهلی شهعبان بارزانی ژێ بهرپرس بوو و نێچیرڤان بارزانی ژی سهرپهرشتی لێ دکر.
ژ ههژی گۆتنێ یه، سهرۆك مهسعود بارزانی ب خۆ سهرپهرشتییا بهرهیێ شهڕی دکر و ژ سهرکردایهتییا پارتی ژی ئهڤ ڕیزدارێن خوارێ دگهل جهنابێ وی پشکداربوون: د. رۆژ نوری شاوهیس، فازل میرانی، د. جهرجیس حهسهن، زهعیم عهلی، ئازاد قهرهداغی، سهید سالح، مقدم یهعقوب، ملازم یونس، حهمید ئهفهندی، بابهکر زێباری، قادر قادر و عومهر ئۆسمان.
شهڕ ب گهرمی بهردهوام بوو و پێشمهرگهی چهندین هێرشێن دوژمنی ب دژواری شکاندن و ب دههان کوشتی و بریندار ژ دوژمنی کهفتن و ژمارهکا مهزنا جاش و لهشکهران ژی ب دیلی کهفتنه دهستێ پێشمهرگهیی، کو گهلهك ئهفسهر و پلهدار ژی دناڤدا بوون، ژ وان ژی فهرماندهیهکێ فهوجێ بوو کو ب برینداری کهفتبوو دهستێ پێشمهرگهی و دهما پێشمهرگهی ئهو دهرمان دکر، وی گۆته پێشمهرگهی:” ئهز ڤێ ئاخفتنێ ژ نیڤا دلێ خوه دبێژم، من بکوژن و دهرمان نهکهن و ههر لهشکهرهکێ دییێ ئیراقێ ژی هوون بگرن بکوژن، ژبەركو حکومهتا ئیراقێ ههموو مافێن ژیانێ یێ ژ وه ستاندین و ب تنێ ئهڤ چیایه یێ د دهستێن وه دا ماین، بهلێ حکومهت وه ژ ههژی ژیانا ڤان چیا ژی نابینیت، لەوما ئهز دبێژم مه مافێ ژیانێ نینه و مه بکوژن”.
پشتی ڤان شکهستنێن دوژمنی یێن ئێك ل دووڤ ئێکێ، حکومهتا عیراقێ ل سپێدههییا ڕۆژا 3/8/1988 چهپهر و بارهگایێن پێشمهرگهیی ل نازدارداخ، خواکوڕك و گادهری، ب ڕێکا فڕۆکهیێن (پیلاتۆز PC7 ) کیمیابارانکرن و د ئهنجامدا نیزکی 60 پێشمهرگا برینداربوون و کو هندهك ژ وان پشتی هینگێ ب کاریگهرییا کیمیاوی شههیدبوون.
