دالاھۆ، ناڤێ کۆمتەکێ بلندە ل رۆژھەلاتێ کوردستانێ، ناڤێ دەڤەردارییەکێ یە، کو سەر ب پارێزگا‌ھا کرماشانێ ڤەیە، وەکو پایتەختێ تەمبۆرێ ل کوردستانێ و ئیرانێ دھێتە نیاسین، ئەڤ دەڤەردارییە جھێ یارسانییانە و پرانییا وان تەمبۆرژەنن و ھۆستایێن چێکرنا تەمبۆران ل وێرێ دژین.
ناسیارترین جھـ بۆ تەمبۆرێ، کو یارسانی دبێژنێ تەمیرە، خانا تەمبۆرێ ل گوندێ بان زلانە یێ سەر ب دالاھۆ ڤە، یانا تەمیرە (خانا تەمبۆرا) وەکو ناڤەندەکا کەلتۆری و ھونەری، ژ ئالییێ عەلی ئەکبەری مورادی، ھونەرمەندێ تەمبۆرژەنێ ناسیارێ کوردستانێ و جیھانێ ھاتییە دروست کرن، تێچوویێ دروستکرنا وێ ژی وی ھونەرمەندی دایە.
تەمیرە (تەمبۆر) ل دەڤەرا یارسانێن دالاھۆ مێژوویەکا شەش ھزار سالی ھەیە و پشکەکە ژ ئایین و کەلتۆرێ خەلکێ وێ دەڤەرێ، ئەڤە دەمێ دو سالانە حکومەتا ئیرانێ بزاڤان دکەت، دالاھۆ وەکو باژێرێ جیھانییێ تەمبۆرێ ژ ئالیێ رێکخستنا جیھانی یا یۆنسکۆیێ بھێتە تۆمار کرن.
نوکە ل دەڤەردارییا دالاھۆ، ١١٠ کارگەھێن مەزن و بچووک بۆ دروستکرنا تەمبۆران ھەیە، کو ١٨٣ ھۆستا تێدا کار دکەن، تەمبۆر ئیکە ژ کەڤنترین ئامیرێن موزیکێ یێن کوردی، کو کاسا وێ ژ دارێ تییێ دھێتە دروستکرن و دەستکێ وێ ژی ژ دارێ گویزێ دھێتە دروستکرن.
