سەرۆک نێچیرڤان بارزانی د کۆمبوونەکێ دا د گەل خاتوو تۆن ئالێرس باڵێوزا نۆروێژ ل ئیراقێ، تائکید ل سەر پێدڤیاتییا ئاوارە و پەنابەرێن ھەرێما کوردستانێ ب بەردەوامییا ھاریکاریکرنا کۆمەلگەھا ناڤدەولەتی کرییە و سوپاسییا ھاریکارێن مرۆڤایەتی و ھاریکاریێن نۆروێژێ بۆ ئاوارە و پەنابەران کر. باڵێوزا نۆروێژ ژی پابەند بوونا وەلاتێ خۆ ل سەر ھاریکاریکرنا بەردەوام بۆ کوردستانێ و ئیراقێ دووپاتکر و دیارکر ژی کو ھەردوو لا د ھاریکار بوون بۆ تێکشکاندنا ئێکجارییا داعشێ، گۆت ژی: ئیراق و ھەرێما کوردستانێ ھێشتا پێدڤیاتی ب پشتەڤانییا کۆمەلگەھا نیڤ دەولەتی ھەیە.
د کۆمبوونەکێ دا کو پشتی نیڤرۆیا ئەڤرۆ ئێکشەمبی ٣١-١-٢٠٢١ێ ل ھەڤلێرێ ب رێڤە چوو، رەوشا ئاوارە و پەنابەران ل کەمپێن ھەرێما کوردستانێ، پێنگاڤێن گۆتوبێژا ھەڤلێرێ و بەغدا بۆ چارەسەرکرنا ئاریشان، رێککەفتنا حکومەتا فیدرالا ئیراقێ و حکوومەتا ھەرێما کوردستانێ بۆ ئاسایکرنا رەوشا شنگالێ، رەوشا دەڤەرێن ماددێ ١٤٠ دەستووری، پرسا بودجا گشتی یا ئیراقێ و پشکا ھەرێما کوردستانێ، ھەلبژارتنێن داھاتی یێن ئیراقێ، کریارا تیرۆرستییا ڤێ دوماھیکێ ل ئیراقێ، سەرھلدانا داعشێ و ئەگەرێن وێ و پێشھاتێن دەڤەرێ ب گشتی ھاتنە باسکرن.
سەرۆک نێچیرڤان بارزانی تەئکید ل بەرھەڤبوون و خواستا ھەرێما کوردستانێ بۆ چارەسەرکرنا ئاریشان ل گەل حکومەتا فیدرالا ئیراقێ و ل سەر بنەمایێ دەستووری و گرنگییا بجھـ ئینانا سیستەمێ فیدرالیێ کر، کو دێ ئارامی و سەقامگیری و پێکڤە ژیانا پێکھاتەیێن ئیراقێ بیت، ھەروەسا دەربارەی رۆلێ ھاریکاریکرنا نەتەوێن ئێکگرتی و کۆمەلگەھا ناڤدەولەتی ب گرنگ ل قەلەم دا.
