فەرماندێ پۆلیسێن نەینەوا راگەھاند، ھێزێن ئەمنی گۆرەکێ دی یێ ب کۆم ل رۆژئاڤایێ پارێزگەھا مووسل دیتییە، رۆفاتێن ٤٠٠ کەسان تێدانە و ھەموو ژ لایێ داعشان ڤە ھاتینە کوشتن.
موقەدەم عەلی ئەعرەجی د کۆنفرانسەکێ رۆژنامەڤانی دا دیار کر: ھێزێن ئەمنی گۆرەکێ دی یێ ب کۆم ل گوندێ حەمیدات یێ سەر ب قەزا تەلەعفەر ڤە، ل رۆژئاڤایێ پارێزگەھا مووسلێ دیتییە و راگەھاند: د وی گۆرێ ب کۆم دا رۆفاتێن ٤٠٠ کەسان، کو کارمەند و گرتیێن گرتیخانا بادۆش یا رۆژئاڤایێ پارێزگەھا نەینەوا بوون، ھەمی ل ١٠ی خزیرانا سالا ٢٠١٤ نە، ژ لایێ داعشێ ڤە ھاتبوونە کوشتن.
ناڤھاتی گۆتییە ژی: ھەموو رۆفاتێن د ناڤا وی گۆری دا، ژ لایێ ھێزێن ئەمنی ڤە رادەستی پشکا نۆژدارێ دادی ل مۆسلێ ھاتینە کرن.
نڤێسینگەھا مافێن مرۆڤی یا سەر ب نەتەوێن یەکگرتی ڤە ل ئیراقێ ھەتا نوکە ٢٠٢ گۆرێن ب کۆم ل پارێزگەھێن نەینەوا، کەرکۆک، سەلاحەددین و ئەنبار دیتینە، ھەموو رۆفاتین د ناڤا وان گۆڕان دا ژ لایێ تیرۆریستێن داعشێ ڤە ھاتینە کوشتن.
