پشتی کو ل سالا بوری ژبەر بەڵاڤبوونا ڤایرۆسێ کۆرۆنایێ و ڕاگەھاندنا قەدەغەیا ھاتنوچوونێ ڕێژا ھاتنا گەشتیارا بۆ ھەرێما کوردستانێ ب گشتی و پاڕێزگەھا دھۆکێ ب تایبەتی کێم ببوو، لێ د ئەڤ سالەدا پێشبینی دھێتە کرن ڕێژا ھاتنا گەشتیاران بەرەف زێدەبوونێ بچیت.
رێوار محەمەد رەشید، پەیڤدارێ ڕێڤەبەریا گشتی یا گەشت و گۆزارێ ل پاڕێزگەھا دھۆکێ بۆ خانی نیۆز گۆت: تنێ د مەھا ۱ یا ئەڤ سالەدا زێدەتر ژ ۲٥ ھزار گەشتیاران سەرەدانا پاڕێزگەھا دھۆکێ کریە، ئەڤەژی بۆ کێمبوونا ڕێژەیا تووشبوویێن کۆرۆنایێ یە د ڤی ماوەی دا ڤەگەراند.
گۆت ژی: ل گۆری ئامارێن سالا ۲۰۱۹ زێدەتر ژ ٥۰۰ ھزار گەشتیاران سەرەدانا پاڕێزگەھا دھۆکێ کربوو، و وان وەکە رێڤەبەریا گەشت و گۆزار د پلان دابوو کۆ ڤێ ڕێژەیێ بەرەف زێدەبوونێ ببەن و وان پێشبینیا ھاتنا ۷۰۰ ھزار گەشتیاران د سالا ۲۰۲۰ دا کربوو، لێ ژبەر رەوشا ساخلەمیی و قەدەغەیێن ھاتنوچوونێ و گرتنا سەرجەم جھێن گەشتیاری ل پاڕێزگەھا دھۆکێ ڕێژا گەشتیاران یێن کو سەرەدانا پاڕێزگەھا دھۆکێ کری بەرەف کێمیێ چوو و ب تنێ نزیکی ١٦٠ ھزار گەشتیاران سەرەدانا پاڕێزگەھا دھۆکێ کربوون د سالا بۆری دا .
ناڤبری گۆت ژی: وان پلانێن باش ھەنە کوۆ د ئەڤ سالە دا کەرتێ گەشت و گۆزارێ بەرەف پێش ببەن و ڕێژەیا ھاتنا گەشتیاران بۆ دھۆکێ بەرەف زێدەبوونێ ببەن، ئەوژی ب ئەنجامدانا چەندین پڕۆژەیێن خزمەتگۆزاری ل جھێن گەشتیاری یێن پاڕێزگەھا دھۆکێ.
خانی نیوز، سەعد عاسف
