ل سالا ٢٠١١ بریار ھاتبوو دان ژبۆ قەرەبوکرنا ١٢٣ سەرۆک خێزانێن د شوقە و ھۆتێلا سکەی ل سیلاڤێ ب کوژمێ ١٨ ملیۆن دیناران و پارچە زەڤیەکێ لێ تانوکە ٤٨ خێزان ژ وان نەھاتینە قەرەبووکرن.
ئەڤراز حەسەن سەرۆکێ باژێرڤانیا ئامێدیێ بۆ خانی نیوز گۆت: ل سالا ٢٠٠٦ سەرژمێری ھاتبوو کرن ژبۆ قەرەبووکرنا وان خێزانان و د سالا ٢٠١١ دا بریارا قەرەبووکرنا وان ھاتبوودان ب پارچەکا زەڤیێ و کوژمێ ١٨ ملیۆن دیناران، لێ ھەتا نوکە ٤٨ سەرۆک خێزان ماینە و پارچە زەڤی وەرنەگرتینە .
ناڤبری زێدەتر گۆت: ل سەرداخوازا وان بریار ھاتیەدان پارچە زەڤیێن وان بھێنە ڤەگوھاستن ژبۆ سنورێ باژێرڤانییا قەدشێ ھندەک ژ وان پارچە زەڤی وەرگرتن و ھندەک ژی ماینە، لێ ژبەر نەبوونا جھی ل سنورێ باژێرڤانییا قەدشێ تا نوکە پارچە زەڤی نەوەرگرتینە، ھەروەسا ئەو خێزانێن پشتی سەرژمێرییا سالا ٢٠٠٦ ژیانا ھەڤژینیێ پێک ئیناین، هه‌تا نوكه چو بریاره‌ك ژ بۆ قه‌ره‌بووكرنا وان نینه.
خەلیل بناڤی ئێک ژ وان وەلاتیانە کو نەھاتییە قەرەبووکرن بۆ خانی نیوز گۆت: ئەو ٤٨ سەرۆک خێزانن و وان پارچە زەڤی نەوەرگرتینە، ھەروەسا ٢٥ ژ وان سەرۆک خێزانان نەپارە و نەپارچە زەڤی نەوەرگرتینە و نێزیکی ٧٠ سەرۆک خێزانان ژیانا ھەڤژینیێ پێک ئینایە و زێدەبووینە، ئەو ژی داخازا قەرەبووکرنێ دکەن ژبەرکو ھندەک جھێن دی قەرەبوو وەرگرتینە، بۆچی قەرەبووکرن بۆ وان نینە.
شوقە و ھۆتێلا سکەی ھاتینەدان بۆ کەرتێ تایبەت و گەشتوگوزارێ و بریارا نوژەنکرنا وێ ژی ژلایێ حکومەتێ ھاتیەدان و وەبەرھێنەک ئەو تەندەرێ وێ وەرگرتییە، لێ ژ ئەگەرێ نەقەرەبووکرنا وەلاتییان تانوکە نەشیاینە دەست بکاری بھێتە کرن.
خانی نیوز، ھەیوار ستار
