خێری عه‌لی ئیبراهیم، رێڤه‌به‌رێ رێكخستنتا ئێزیدی یا دیكیۆمێنتكرنێ ل شنگالێ بۆ خانی نیوز راگه‌هاند؛ تا نها 450 رۆفاتێن شنگالێ د 20 گۆرێن بكۆم دا هاتینه هلدان و 104 رۆفات ژ وان ئیرۆ وه‌ك قوناغا ئێكێ د رێوره‌سمه‌كا سه‌ربازی دا ل به‌غدا ده‌ستپێكرن و ژ فرۆكه‌خانه‌یا به‌غدا دێ بۆ پارێزگه‌ها مووسلێ ب رێكه‌ڤن، پاشان ئه‌و رۆفات ب رێوره‌سم دێ ژ مووسل بۆ كۆچۆ ل شنگال هێن ڤه‌گوهاستن.
خێری عه‌لی خویا ژی كر، رۆفاتێن شه‌هیدێن كۆچۆ ل رۆژا شه‌مبیێ ب ئاماده‌بوونا نوونه‌رێن حكومه‌تێن كوردستان و ئیراقێ و ئاماده‌بوونا نادیا موراد، چالاكڤان و رزگاربوویا ده‌ستێ داعشێ و هژماره‌كا كه‌ساتیێن ئێزیدی یێن وه‌لاتێ ئه‌رمینیا د رێوره‌سمه‌كێ تایبه‌ت دا دێ ل گۆرستانا كۆچۆ یا تایبه‌ت ب قوربانیێن داعشێ هاتییه دانان هێن ڤه‌شارتن.
ل دۆر ئاماده‌كرنا رێ و ره‌سمان، رائید فه‌لاح حه‌سه‌ن ل رێڤه‌به‌رییا جینۆساید و كۆمكرنا به‌لگه‌یان بۆ خانی نیوز گۆت: ئه‌و نها ل شنگالێ نه ژ بۆ ئاماده‌كاریێن رێوره‌سمان، كۆمكرنا گۆڕان و هلدانا رۆفاتێن وان ژ ئالیێ ده‌سته‌یا ڤه‌كۆلین و كۆمكرنا به‌لگه‌یان ل دهۆكێ ب هه‌ماهه‌نگی د گه‌ل رێڤه‌به‌رییا بێ سه‌روشوینان، وه‌زاره‌تا شه‌هید و ئه‌نفالكرییان ل حكومه‌تێن هه‌رێم و ئیراقێ و هه‌روه‌ها پزیشكییا داد ل به‌غدا و رێكخستنا بێ سه‌روشوینان یا نێڤده‌وله‌تی هاتییه ب رێڤه‌برن.
