وه‌زاره‌تا كۆچ و كۆچبه‌رێن ئیراقێ راگه‌هاند، 95% ئاوارێن پارێزگه‌ها ئه‌نبار و 70% یا ئاوارێن قه‌زا تلله‌عفر ڤه‌گه‌ریاینه ده‌ڤه‌رێن خۆه.
عه‌لى عه‌باس جانگیر، رێڤه‌به‌رێ كاروبارێن لقان ل وه‌زاره‌تا كۆچ و كۆچبه‌رێن ئیراقێ راگه‌هاند، وه‌زاره‌تا وان هه‌مى بزاڤان دكه‌ت ڤه‌گه‌ریانا ئاواران یا ئاره‌زوومه‌ندانه بیت و چ لایه‌نه‌ك ژى نه‌شیت ئاواران نه‌چار بكه‌ت ڤه‌گه‌رن.
ب گۆتنا وى به‌رپرسێ وه‌زاره‌تا كۆچ و كۆچبه‌ران، د ئهڤساله دا هه‌ژماره‌كا مه‌زن یا ئاواران ڤه‌گه‌ریاینه ده‌ڤه‌رێن خۆه و 18 كه‌مپێن ئاواران هاتینه دائێخستن، د نها دا بتنێ سێ كه‌مپێن ئاواران ل هه‌رێما كوردستانێ ماینه و شه‌ش هزار ئاواره تێدا ئاكنجینه.
ل گۆره‌ى دوماهى ئامارا ناڤه‌ندا هه‌ڤپشك یا قه‌یرانان سه‌ر ب وه‌زاره‌تا نافخوه یا هه‌رێما كوردستانێ، هێشتا حه‌فت سه‌د و سیهـ و چوار هزار و حه‌فت سه‌د و سێزده ئاواره ل هه‌رێما كوردستانێ ماینه.
عه‌لى عه‌باس جانگیر زێده‌تر گۆت، دۆسه‌یا ئاوارێن ڤه‌گه‌ریای تووشى چه‌ندین كێشه و ئاسته‌نگان بووینه، ژ وان دابین نه‌كرنا خزمه‌تگوزایێن پێدڤى بۆ وان ئاوارێن دڤێت ڤه‌گه‌رن، زێده‌بارى نه‌بوونا ژێرخانه‌كێ بۆ ئاكنجیبوونا وان، لێ ئه‌و كێشه ب هه‌ماهه‌نگى دگه‌ل ده‌زگه‌هێن ئه‌منى و حكومه‌تێن خوجهى و رێكخستنێن نافخوه‌یى و ناڤده‌وله‌تى هاتنیه چاره‌سه‌ركرن.
د وى چارچۆڤه‌ى دا، وه‌زاره‌تا كۆچ و كۆچبه‌رێن ئیراقێ 500 كه‌ره‌ڤان بشێوه‌یه‌كێ ده‌مكى ب سه‌ر هنده‌ك خێزانێن ئاواران دا ل سه‌لاحه‌دین و مووسل به‌لاڤكرینه، تا وى ده‌مێ خانیێن وان دهێنه نووژه‌نكرن.
