ستیڤن هیكى: مەسرور بارزانی و مسته‌فا كازمی‌ حه‌زا چارەسه‌ركرنا ئاریشه‌یان هەیە

بالیۆزێ بریتانیا ل بەغدا راگه‌هاند: بشتى ڕێكه‌فتنا د ناڤبه‌را هەولێر و بەغدادا ل سەر بودجێ 2021، ب هیڤینه‌ ده‌رفه‌ته‌كا مه‌زنتر بهێته‌ پێش بۆ چاره‌سه‌ركرنا ئاریشه‌یێن ده‌ڤه‌رێن كێشه‌ ل سه‌ر، و مەسرور بارزانی و مسته‌فا كازمی‌ حه‌زا چارەسه‌ركرنا ئاریشه‌یان هەیە. ‌

ستیڤن هیكی، بالیۆزێ بریتانیا ل بەغدا، شەڤا بورى 10ـی شوباتێ 2021، بۆ كەناڵه‌كێ میدیایى یێ ئیراقی دیاركر، سەبارەت ب ڕێكه‌فتنا د ناڤبه‌را هەولێر و بەغدا دا راگه‌هاند: حەفتییا بورى ئه‌و ل هەولێرێ بوویه‌، ل گەڵ سەركرده‌یێن كوردان گۆتوبێژكرینه‌، یا گرنگە رێكه‌ڤتن د ناڤبه‌را حكومەتا هەرێما كوردستانێ و بەغدادا هەبیت.

دوپاتكر ژى، وان ئاخفتن دگه‌ل سەركرده‌یێن هەولێر و بەغدایێ كریه‌، هەردوولا نزیكن رێكبكه‌ڤن و جوداهیه‌كا زۆر د ناڤبه‌را هەولێر و بەغدا دا نەمایه.

ستیڤن هیكی گۆت ژى: ئه‌و هیڤیداره‌ پشتى ڕێكه‌ڤتنا دناڤبه‌را هەولێر و بەغدا ل سەر بودجێ 2021، ده‌رفه‌ته‌كا مه‌زنتر بهێته‌ پێش بۆ چاره‌سه‌ركرنا ئاریشه‌یێن سیاسیی د ناڤبه‌را وان دا، بۆ نموونە ل شنگالێ و كەركووكێ، چونكی لڤینێن داعشێ ل وێ ده‌ڤه‌رێ زۆر بوویه‌ و پێدڤییه‌ هەولێر و بەغدا ب هه‌ڤپشكى و رێكه‌فتن دناڤبه‌را واندا هه‌بیت.