پەیڤدارێ سەرۆکاتییا کۆماری یا تورکیا ل دۆر ئۆپەراسیۆنێن سوپایێ وەلاتێ خوە ل چیایێ گارەی ل ناڤا سنۆرێن ھەرێما کوردستانێ ل دژی گەریلایێن پەکەکێ راگەھاند، ھەتا بنبرکرنا پەکەکێ ئۆپەراسیۆنێن وان دێ بەردەوام بن.
ئیبراھیم کالن، پەیڤدارێ سەرۆکاتییا کۆماری یا تورکیا بۆ میدیایێن وەلاتێ خوە راگەھاند، ئەو ب رێککەفتنا د ناڤبەرا ھەولێرێ و بەغدا دا ل دۆر ئاساییکرنا رەوشا شنگالێ دلخۆش بوون، ئەو یەک ژی گاڤەکا گرنگ بوو بۆ نەھێلانا ترس و گەفان ل وان دەڤەران، لێ رێککەفتن ب تنێ بەس نینە، ژبەرکو بەغدا و ھەولێر دزانن رەوش ئالۆزە و پێدڤی ب کارەکێ ھەڤپشک یێ زێدەتر ھەیە.
ئیبراھیم کالن دوپات کر کو چاڤێ تورکیا ل ئاخا ئیراقێ نینە و گۆت: ھەکە ژ وێ ئاخێ گەف ل سەر ئاساییشا وان نەھێن کرن، تورکیا ژی ھێرشان ناکەت و پێدڤی ب ئۆپەراسیۆنێن سەربازی ژی نابن.
ل دۆر ئۆپەراسیۆنا چیایێ گارەی یا بەری دو رۆژان دەستپێکری کالنی گۆت: تا نھا سێ سەربازێن وان د وێ ئۆپەراسیۆنێ دا ھاتینە کوشتن، لەورا پێدڤییە بەردەوامیێ ب وێ ئۆپەراسیۆنێ بدەن، بۆ ھێرشکرنا ل سەر شنگالێ ژی ئەو چاڤەرێ پیشھاتان دکەن، ھەکە گەف ل وێ دەڤەرێ ب داوی نەھێن، ئۆپەراسیۆنا ل سەر شنگالێ ژی بژاردەیەکا ڤەکرییە.
