وەزارەتا دەرڤەیا عیراقێ بۆ خانی نیوز: بۆ دانانا بالیۆزان چاڤەرێیی رێککەفتنا سیاسینە

پەیڤدارێ وەزارەتا دەرڤەیا ئیراقێ ددەتە خوییاکرن، ئەو چاڤەڕێى لایەنێن سیاسینە بۆ رێککەفتن ل سەر پشکا وان د بالیۆزێن وەڵاتان دا.

د.ئەحمەد سەحاف، د داخویانییەکا تایبەت دا بۆ “خانی نیوز” گۆت: پشکا بالیۆزان هەتا نها ئالۆزی و ململانێیا سیاسیی ل سەرە و لایەنێن سیاسیێن ئیراقێ نەگەهشتینە چ رێککەفتنان.

سەحافی ئاماژەدا، ئەو چاڤەڕێی ئالییێن سیاسینە بۆ گەهشتن ب ڕیککەفتنەکێ و هەتا نها نەدیارە پشکا هەر ئالییەکی دێ چەند بیت، د جڤینا ئالییێن سیاسییدا ئه‌و پێدڤی ب تەوافقێنە.

ل گۆرەیی زانیاریێن “خانی نیوز” پارتی و ئێکەتی بەربژارێن خوه‌ دیارکرینە بۆ ڤان پۆستان.

کورد داخوازا ٦ بالیۆزان دکەن و “نیڤ” رێککەفتنەک ژی دناڤ کوردان دا هاتییە کرن، ٣ بالیۆز پشکا پارتی ٢ بالیۆز ژی پشکا ئێکەتی و ١ بالیۆز هێشتا رێککەفتن ل سەر نەهاتییە کرنە.

کورد داخواز دکەن وان بالیۆز ل هندەک وەڵاتێن جیهانی یێن خودان هەژموون هەبن.

هەر چەندە وەزارەتا دەرڤەیا ئیراقێ، وەک وەزارەتەکا سیادی د دەستێ کوردان داییە ژ وانا ژی پشکا پارتی یە و فوئاد حوسێن وەزیرێ وێ یە.

خانی نیوز، کاروان باعەدری