د ماوەیێ ھەبوونا ڤایروسا کۆرۆنایێ دا رێکارێن دەرئینانا پاسپۆرتان گۆھارتن ب سەردا ھاتبوون، د نۆکە دا جارەکا دی گهۆرین ب سەردا ھاتن و ئاسانکاری بۆ وه‌لاتیان ھاتییە کرن.
نەقیب سەعد ئیسماعیل، بەرپڕسێ ڕاگەهاندنا ڕێڤەبەرییا پاسپۆرتان ل دھۆکێ تایبەت بۆ خانی نیوز گۆت: پشتی کو رێکارێن دەرئینانا پاسپۆرتان ب شێوەیەکێ بوون د ماوەیێ بوری دا ب تنێ بۆ حالەتێن تایبەت خەلکی د شیان پاسپۆرتان دەربینن و سەرەدانا ژدەرڤەی وەلاتی بکەن، لێ د نۆکە گهۆرین ب سه‌ر ئەوان رێکاران ھاتینە و ھەموو کەس دشێن سەرەدانا وان بکەن و مامەلەیێن خوه ب شێوەیەکێ ساناھی ب ڕێڤەببەن و دشێن ببنە خۆدان پاسپۆرت.
سەعد ئیسماعیل گۆتژی، ئەو کەسێن د نۆکە دا سەرەدانا وان دکەن ئەگەر بەڵگەنامەیێن وان درست بن و مامەلەیا وان ب ڕێڤەبچیت پشتی بورینا ۷۲ دەژمێران ئەو دشێن ببینە خۆدان پاسپۆرت و ئەو دێ ب رێکا هژماڕا مۆبایلێ یان ئیمەیلەکێ کو ب زمانێ کوردی و عەرەبی ئاگەھدارییا وان کەسان دکەن کو بچن و پاسپۆرتێن خوه وەربگرن.
ئەو یەکژی دیارکر، ئەو بەردەوام بۆ ئاوارەیێن کو ل پاڕێزگەھا دھۆکێنە پاسپۆرتان دەردئینن و ھەیڤانە ھزار بۆ ھزار و ٥۰۰ ئاوارەیان پاسپۆرتان دەردئینن کو ئەو ژی ڕێزبەندییا وان دھێتە دیارکرن ب رێکا پەیجێ وان یێ فەیسبۆکێ و داخاز کر کو ئاوارە چاڤدێرییا وی پەیجی بکەن بۆ دیتنا دەمێ خوه یێ دروستکرنا مامەلەیێ.
بەرپڕسێ ڕاگەهاندنا ڕێڤەبەرییا پاسپۆرتان ل دھۆکێ ڕاگەھاند ژی، ڕۆژانە ۳۰۰ ھەتا ٤۰۰ کەسان بۆ دەرئینانا پاسپۆرتێ سەرەدانا وان دکەن، ل سالێن بۆرى نزیكى ۲ ھزار کەسان سەرەدانا وان کریە و پاسپۆرتێن وان دەرکەفتینە، لێ وان کەسان دووبارە سەرەدانا وان نەکریە کو پاسپۆرتێن خوه وەربگرن، و ئەو چاڤەرێ بریارەکێنە کو چارەنڤیسێ وان پاسپۆرتان دیارببین، و پێشبینی کر کو جارەکا دی بزڤرنەڤە بۆ بەغدا و ل وی دەمی ئەو کەس نەچارن سەرەدانا بەغدایێ بکەن بۆ وەرگرتنا پاسپۆرتێن خوه چۆنکی ئەو نەشێن چ پاسپۆرتێن نوو دەربینن.
