ئەردۆغان: بۆ شەرێ دژی تیرۆرێ دەستویریێ ژ کەسێ ناخوازین

سەرۆککۆمارێ تورکیا راگەھاند، ئەنقەرە پێدڤی ب دەستویرییا کەسێ نینە بۆ ئۆپەراسیۆنێن سەربازی ل دژی تیرۆرێ ژ دەرڤەی سنۆرێن خوە، وەکو ئاماژەیەک بۆ پارتییا کارکەرێن کوردستانێ پەکەکێ.

رەجەب تەیب ئەردۆغان د کۆمبوونا د گەل فراکسیۆنا پارتییا خوە یا داد و گەشەپێدان ئاکەپێ یا دەستھەلاتدار راگەھاند، ئۆپەراسیۆنێن دژی تیرۆرێ یێن سوپایێ تورکیا ل ناڤ و دەرڤەیا تورکیا دکەت، مافەکێ شەرعی و ئەرکەکێ مرۆڤاتییە بۆ وەلاتێ وی، ئەو پێدڤی ب دەستویرییا کەسێ ژی نینن دا ئەرکێن خوە بجھـ بینن.

دەمەکێ درێژە سوپایێ تورکیا ئۆپەراسیۆنان ل ناڤا ئاخا ھەرێما کوردستانێ و رۆژئاڤایێ کوردستانێ دکەت، بەھانەیا وان ژی ھەبوونا گەریلایێن پارتییا کارکەرێن کوردستانێ پەکەکێ یە کو تورکیا ب رێکخستنەکا تیرۆری ب ناڤ دکەت و وەکو گەف ل سەر ئاساییشا خوەیا نەتەوەیی دزانیت.