حەشدا شەعبی بریاردایه چەک و پێدڤیێن سەربازی بدهتە پەکەکێ ب بههانهیا پاراستنا شنگالێ، ئەڤ چهنده هات پشتى کۆمبوونا نوونەرێن پەکەکێ و حەشدێ ل حەفتییا بورى، هەروەسا بریار ل سهر ڤهكرنا رێیا حەسەکێ و شنگالێ و زێدهترکرنا دەستههلاتا پهكهكێ ل مەخمور دایه.
میدیایێن عەرەبی ژ زاردهڤێ بەرپرسهكێ پشكدار د وێ کۆمبوونێ دا گۆتیی، ل دووماهییا حهفتییا بورى هژمارەكا گرۆپێن چەکدارى یێن حەشدێ، كو نێزیکى ئیرانێ نه ل گەل نوونەرێن پەکەکێ کۆمبووینە، ژ وان ژى سەرکردهیێن گرۆپێ نوجەبا و هژمارەكا ئەفسەرێن پاسدارێن ئیرانێ و نوونەرێن پەکەکێ و هێزێن پاراستنا شنگالێ.
ل دووڤ گۆتنا میدیایێن عەرەبى، حەشدێ بریار دایه شنگالێ بجهـ نههێلیت، ئەڤه ژى بهرۆڤاژى رێککەفتنا هەولێرێ و بەغدا یە بۆ ئاسایکرنا رهوشا شنگالێ، لیوایەکا گرۆپێ نوجەبا هاتییه راسپاردن، کو بەرپرسیارییەتا ئەمنی یا وێ دهڤهرێ بگرنه ستوویێ خوه، بڕیار هاتییه دان هەماهەنگیا بەردەوام دنابڤهرا پاسداران و پەکەکێ و حەشدێ ل وێ دهڤهرێ یا بەردەوام بیت و گروپێن چەکداری یێن حزبولایا ئیراقى هاتینه راسپاردن، كو چهك و پێدڤیێن سەربازی بدهتە پەکەکێ، “محەمەد کەوسەرانی”، سەرکردێ حزبولایا لبنانى پشتى ژ ئیرانێ ڤهگهریاى، پشكداری د وێ کۆمبوونێ دا کرییە.
ههروهسا دیار كرییه، ب بههانهیا کێمبوونا کەلوپەلێن سەربازی یێن پەکەکێ ل شنگالێ، حەشدێ بریار دایە، گوللـە و پێدڤیێن سەربازی و موشەکێن جۆرێ (107) ملم بدهتە پەکەکێ، رۆژهكێ پشتى وێ کۆمبوونێ حهشدێ موشەك داینە پەکەکێ و ئهو موشەک ژى یێن ئیرانێ بووینه.
مالپەرێ عەرەبیک پۆست دیار كرییه ژى، هەموو لایهن رێککهفتینه، کو ئەمنیەتا شنگالێ ب پارێزن و ل گهل هندێ بڕیار دایە رێكێ بدهنه پهكهكێ رێیا دناڤبهرا حەسەکێ ل رۆژئاڤایێ کوردستانێ و شنگالێ بۆ ڤهگوهاستنا چەکدار و کەلوپەلێن سەربازی و مەدەنی بکاربینیت.
پەکەکە و حەشدا شەعبی رێککەفتینه، ئەمنیەتا وێ رێكێ بگرنه ستوویێ خوه، بۆ بەرسنگگرتنا هێرشێن ئەمریکا بۆ سەر بنگههێن حەشدێ ل وێ دهڤهرێ و هەماهەنگییهكا باش ژى ل گهل ئێك بكهن.
ههروهسا هەردۆلار ل سەر دەستڤهكرنا زێدهتر بۆ پەکەکێ ل مەخمور رێککەفتینه، بۆ هندێ دەستههلاتا پەکەکێ زێدهتر ل مەخمور ب سەپینن و داكو هاریکارییا زێدهتر یا چەکداران ل وێ دهڤهرێ بهێته كرن.
