ئێکەم جارە ل جیھانێ پاپا ل دەرڤەی پایتەختی نڤێژێ دکەت

ل پارێزگەھا دھۆکێ ب رێکا کەنیسەیێن کاسۆلیکی سریانی و کلدانی دوو ھزار ناڤ ھاتینە تۆمارکرن داکو پشکداریێ د رێورەسمێن پشێوازیکرنا پاپایێ ڤاتیکانێ ل ھەولێرێ بکەن و باجێن پشكداریێ ژی بۆ ھەموویان ھاتینە دروستکرن.
چالاکڤانەکێ کریستییانان ل دھۆکێ خویاکر: زێدەتری 15 رۆژانە کریستییانێن دھۆکێ ئامادەکارییان بۆ پێشوازیکرنا پاپایێ ڤاتیکانێ دكه‌ن کو بریار ئەوە سۆبەھی سەرەدانا ئیراقێ بکەت و رۆژا ئێک شەمبیێ ژی سەرەدانا ھەولێرێ بکەت.
ھەیسەم پەتڕۆس وەک چالاکڤانەکێ کریستییانان بۆ خانی نیوز ئاشکراکر: کەنیسەیێن کاسۆلیکی سریانی ب رێکا ئەبرەشەیێن خوە ل دەڤەرداریێن پارێزگەھێ ناڤێن وان کەسان تۆمارکرینە یێن کۆ دڤێن پشکداریێ ل پێشوازیکرنا پاپای دا بکەن، ھەر دەڤەرداریەکێ 350 ناڤ ھاتینە نڤیسین، و باجێن پشكداریێ ژى بۆ ھەمویان ھاتینە چێکرن، بریارە ئەو رۆژا ئێکشەمبی ب رێکا کۆستەران بھێنە ڤەگۆھاستن بۆ ھەولێرێ و ل یاریگەھا فەرەنسۆ حەریری پشێوازیێ ل پاپای بکەن.

گۆت ژی رەنگە زێدەتری دوو ھزار کەسیێن دی ژی یێن کۆ باجێن پشكداریێ ڤێرا نەگەھشتی بچنە پێشوازییا پاپاى.
ھەیسەم پەترۆس گۆت ژی: ئێکەم جارە ل سەر ئاستێ جیھانێ پاپا دەمێ دچیتە وەلاتەکێ نڤێژی ل دەرڤەی پایتەختی دکەت، ژبەر کو بریار ئەوە پاپا فرانسیس د سەرەدانا خوە دا بۆ ئیراقێ نڤێژێ ل یاریگەھا فەرەنسۆ حەریری ل ھەولێرێ بکەت، دھێتە پێشبینیکرن زێدەتری 10 ھزار کریستییان ئامادەببن.
ب گۆتنا ھەیسەم پەترۆس: 135 کاردینال و مەتران ل سەر ئاستێ جیھانێ یاوەرییا سەرەدانا پاپا دێ کەن.

خانى نیوز، عه‌بدوللا عه‌لى