پشتی پتر ژ پێنچ ھەیڤان پارەیێ وانەبێژێن ل پارێزگەھا دھۆکێ گیرۆبووی و نەھاتینە بەلاڤەکرن، دەنگۆیێ بایکۆتکرنا ھۆلێن خواندنێ ل قەزا بەردەرش ھاتییەکرن، وانەبێژان ھۆلێن خواندنێ بجھـ ھێلاینە، وەزیرێ پەروەردێ راستەوخۆ ل گەل سەرۆکا لژنا پەروەردێ ل جڤاتا پارێزگەھا دھۆکێ، ل گەل رێڤەبەرێ گشتیێ پەروەردێ بابەت چارەسەرکر.
جومبەد شوکری، سەرۆکا لژنا پەروەردێ و ئەو قاف و کارۆبارێن ئاینی ل پارێزگەھا دھۆکێ، ئەڤرۆ ئێڤاری ٤-٣-٢٠٢١ بۆ خانی نیۆز ئاشکراکر کو پشتی ھاتییە ئاگەھدارکرن ب رێکا ئەندامەکا جڤاتێ کو نوونەرا قەزا (بەردەرش)ە دەنگۆیێ بایکۆتکرنا ھۆلێن خواندنێ ل قەزا ناڤبری وەک مافەکێ مامۆستایێن وانەبێژ وان بابەت راستەوخۆ گەھاندە د. ئالان حەمە سەعید وەزیرێ پەرورەدێ ب سوپاسی ڤە پشتەڤانییا خوە دیارکر و بابەت ل گەل رێڤەبەرێ گشتیێ پەروەردێ عومەر عەلی تاھا ھاتە گەنگەشەکرن و بریار ھاتەدان حەفتیا بھێت پارەیێ وانەبێژین پارێزگەھا دھۆکێ بھێتە بەلاڤەکرن.
سەرۆکا لژنا پەروەردێ ل جڤاتێ، دیارکر ژی کو وەزیرێ پەروەردێ ھەردەم ھاریکار و پشتەڤان بوویە و ھەر دەما وان ئاریشەک یان گازندەک گەھاندبیت ھەر ئێکسەر پشتەڤانی کریە و چارەسەربوویە، کەرتێ پەروەردێ گەلەکێ گرنگە و بڕبرا پشتێ یا ھەر وەلاتەکی یە، کەرتێ پەروەردێ ل پارێزگەھا دھۆکێ گەلەک ئاریشە ھەنە ژ کێمبوونا میلاکی و نەبوونا ئاڤاھییان و گەلەک کێشێن دی.
خانی نیۆز، سالار محەمەد دۆسکی
