ب هه‌لكه‌فتا 30 سالییا سه‌رهلدانا ئادارا سالا 1991 یا گه‌لێ كوردستانێ، گه‌رمترین پیرۆزباهییان ل خه‌لكێ كوردستانێ و بتایبه‌ت پێشمه‌رگێن قه‌هره‌مان و بنه‌مالێن سه‌ربلندێن شه‌هیدان دكه‌م.
سه‌رهلدانا ئادارا سالا 1991 ئێكه ژ سه‌روه‌ری یێن مه‌زنێن گه‌لێ كورد كو به‌رهه‌مێ ئێكرێزی و ئێكگرتنا هه‌موو چین و پێكهاته‌یێن گه‌لێ كوردستانێ و هێز و ئالیێن كوردستانی بوو، بێ ده‌نگنه‌بوون ل هه‌مبه‌ر سته‌م و داگیركاری و بنده‌ستیێ بوو، سه‌رهلدان وه‌رچه‌رخانه‌كا دیرۆكی بوو د شۆره‌ش و به‌رخوه‌دان و بزاڤا رزگاریخوازا گه‌لێ كوردستانێ دا كو به‌رهه‌مێ وێ دروستبوونا قه‌واره‌یێ فیدرالی یێ هه‌رێما كوردستانێ و سازیێن شه‌رعی و ده‌ستووری یێن هه‌رێمێ بوو كو پێدڤییه ئه‌ڤرۆ ژی هه‌ر تاكه‌كێ كورد و هه‌موو ئالی و پێكهاته، ب ئێكرێزی و ئێكده‌نگ دوپاتییێ ل ده‌ستكه‌فتێن نشتیمانی و مافێن ده‌ستووری یێن گه‌لێ كوردستانێ بكه‌ن.
پێدڤییه بهایێ مه‌زنێ سه‌رهلدانێ، بنه‌مایێن پێكڤه‌ژیانا ئاشتییانه و گیانێ لێبۆرین و ئاشتیخواز و مرۆڤدۆستییا گه‌لێ كورد بپارێزین و باشتر بكه‌ین.
مه‌سروور بارزانی د داویا په‌یاما خوه دا دبێژیت: ب هه‌لكه‌فتا سه‌رهلدانێ، پێدڤییه بزاڤێن زێده‌تر ژ بۆ پشته‌ڤانییا حكومه‌تا هه‌رێما كوردستانێ بكه‌ین داكو بكاریت ب باشترین شێوه، كارنامه‌یا چاكسازییێ بجهبینیت و خزمه‌ته‌كا باشتر پێشكێشی هه‌موو خه‌لكێ كوردستانێ بكه‌ت و پێكڤه هه‌رێما كوردستانێ به‌ره‌ڤ قوناغه‌كا باشتر ببه‌ن.
بلند و شكۆدار بت سالڤه‌گه‌را سه‌رهلدانا ئادارا 1991
سه‌ربلندی و خوه‌چه‌ماندن بۆ شه‌هیدێن سه‌رهلدانێ و هه‌موو شه‌هیدێن كوردستانێ
