رێڤه‌به‌رێ كۆمه‌لگه‌ها سه‌رزێری: بزاڤان دكه‌ین ده‌روازه‌ ژ گه‌شتیاری ببت بازرگانی

ده‌رگه‌هێ سه‌رزێرى ب شيوه‌يه‌كێ گه‌شتيارى هاتییه‌ ڤه‌كرن، ژ بلی كو دێ لێكگوهارتنه‌كا بازرگاني یا سڤك ب خوه‌ڤه‌گریت، ب تايبه‌ت به‌رهه‌مێ چاندنێ يێ ناڤخۆ.

عرفان سلمان عبدالله، رێڤه‌به‌رێ ده‌روازه‌یا سه‌رزێرى تايبه‌ت بۆ خانی نيوز گۆت: پشتى دوهی ب سه‌رپه‌رشتيیا ئيسماعيل مسته‌فا ره‌شيد، قايمقامێ قه‌زا ئامێديێ و دگه‌ل رێڤه‌به‌رێ كۆمه‌لگه‌ها سه‌رزێری وان سه‌ردانا قايمقامییا قه‌زا چه‌لێ كرین و كۆمبوونه‌ك ب ئاماده‌بونا چه‌ندين به‌رپرس و رێڤه‌به‌رێن حكومى یێن ئامێدیێ ل هۆلا قايمقامییا چه‌لێ هاته‌ به‌ستن  و ئه‌و لسه‌ر چه‌ندین خالان رێككه‌فتين كو ئه‌و ده‌رگه‌هه‌ بشێوه‌یه‌كێ گه‌شتيارى سه‌ره‌ده‌رى دگه‌ل بهێته‌ كرن و لده‌ست پێكێ دێ بزاڤان كه‌ن كو لێكگوهارتنا به‌رهه‌مێ خۆمالى يێ  چاندنێ  هێدی هێدی ب رێكا ترومبێلێن بارهه‌لگر بۆ هه‌ردوئالییان بهێته‌ ڤه‌گوهاستن و دێ كار ژ بۆ هندێ كه‌ن ژ بازرگانيه‌كا بچوك به‌ره‌ڤ بازرگانيه‌كا مه‌زن يا باش بچيت .

رێڤه‌به‌رێ كۆمه‌لگه‌هێ گۆت ژی: ده‌م هاتییه‌ ئه‌و ده‌رگه‌هه‌ بهێته‌ گوهۆرين و كۆنترولێ جورى ل ده‌روازه‌یا سه‌رزێرى بهێته‌ دان، ل وى ده‌مى دێ بيته‌ بازرگانى لێ ئه‌ڤه‌ ژى ب چه‌ندین خالان گرێدايه‌ كو رێكه‌كا به‌ديل  بهێته‌ چێكرن و تونێلا چيايێ مه‌تينا  بهێته‌ ڤه‌كرن و ديسان ده‌روازه‌ ب شێوازه‌كێ  ئه‌ندازيارى يێ سه‌رده‌م و نوو بهێته‌ ئاڤاكرن .

عرفان سلێمان دیار ژی كر، نها بازرگانيیه‌كا سنوردار  دێ هێته‌ كرن و ترومبێلێن بارهه‌لگر ل دووڤ پيڤه‌را جادده‌یێن مه‌ دێ ل ده‌روازا سه‌ر زێرى هاتن و چۆنێ كه‌ن .

رێڤه‌به‌رێ ده‌روازێ زێده‌تر گۆت: ئه‌و پێشه‌وازيا  دوهی  ژ ئالییێ قايمقاميیا قه‌زا چه‌لێ ڤه‌ لشاندێ مه‌ هاتيیه‌ كرن ب ديرۆكا دامه‌زراندنا ڤێ ده‌روازه‌ى دهێته ‌زانین،  پێشوازییه‌كا مه‌زن ل وان كرینه‌ و قایمقامێ چه‌لێ داخواز ژ قايمقامێ ئامێديێ كر، ل ترومبێلا وى يا تايبه‌ت سيار ببيت, هه‌روه‌سا ئالايێ كوردستانێ ل ته‌نيشت ئالايێ ئێراقێ ل هۆلا كۆمبوونێ هاتبوو هه‌لاويستن و ئه‌ڤه‌ژى ببو ده‌ستپێشخه‌ريیه‌ك ژ بۆ بهێزكرنا په‌يوه‌نديیان د ناڤبه‌را هه‌ردوو قه‌زايان دا .

ئه‌حمه‌د ئه‌دنى، خانى نيوز