دادگه‌ها ده‌ستوورى یا توركیا بۆ ڤه‌كۆلینێ ل دور دۆسه‌یا داخوازا داخستنا پارتییا دیمۆكراتیك یا گه‌لان هه‌ده‌پێ دێ كۆم بیت و ل سه‌ر داخستن یان ره‌تكرنا وێ داخوازێ دێ بریارێ ده‌ت.
ئه‌ڤرۆ ل ئه‌نقه‌ره‌یا پایته‌حتێ توركیا كومبوونا ئێكێ یا جڤاتا گشتى یا دادگه‌ها ده‌ستوورى یا توركیا بۆ ڤه‌كۆلینان ل دۆر دۆسه‌یا داخستنا هه‌ده‌پێ دێ ده‌ستپێكه‌ت.
دادگه‌ها ده‌ستوورى یا توركیا زوهتو ئارسه‌لان، سه‌رۆكێ دادگه‌ها بلند یا ده‌ستوورى یا توركیا راسپاردییه بۆ ڤه‌كۆلینان ل سه‌ر وێ سكالایا ژلایێ دۆزگه‌رێ گشتى یێ توركیا ڤه بۆ داخستنا هه‌ده‌پێ هاتییه تۆماركرن، هه‌كه جڤاتا گشتى یا ده‌ستوورى یا توركیا سكالایێ په‌سه‌ند بكه‌ت دێ قۆناغا یاسایى یا پرۆسه‌یا داخستنا هه‌ده‌پێ ب فه‌رمى ده‌ستپێكه‌ت.
بۆ به‌ره‌ڤانیكرنێ ژخوه ئه‌و دۆسه‌یه بۆ هه‌ده‌پێ دێ هێته هنارتن و پێدڤییه هه‌ده‌په د ده‌مێ 60 رۆژان دا ژ وێ رۆژا دادگه‌هـ بۆ دیاردكه‌ت به‌رگرییێ ژخوه بكه‌ت.
ل گۆره‌ى بۆچوونا هه‌ده‌پێ ده‌ستهه‌لاتا ئاكه‌پێ و مه‌هه‌پێ نه‌شێن پارتییا وان ب دائێخن و بزاڤ بۆ داخستنا هه‌ده‌پێ وه‌كو بزاڤه‌كا بێ به‌رهه‌م بناڤ دكه‌ن و ئه‌و دێ هه‌موو بزاڤان كه‌ن بۆ ده‌ربازكرنا ڤێ قۆناغێ.
پارتییا دیمۆكراتیك یا گه‌لان هه‌ده‌په سێیه‌م مه‌زنترین فراكسیۆنا په‌رله‌مانێ توركیا یه و ل داوى هه‌لبژارتنا په‌رله‌مانى ل سالا 2018ێ، 11.7 ژ سه‌دێ یا ده‌نگان ب ده‌ست خوه‌ڤه ئینابوون و شیان ژ سه‌رجه‌مێ 600 كورسیێن په‌رله‌مانى 67 كورسییان ب ده‌ستڤه‌ئینان.
